CADC-ah MNF sawrkar a ding zui dawn niin a lang

Chakma Autonomous District Council (CADC)-ah MDC tam zawk ten ZPM zawm-a ZPM sawrkar din an tum chu heng MDC te hian MNF-a let leh an tum avangin MNF sawrkar a ding zui ta zawk dawn niin a lang.

CADC sawrkara MNF MDC 16 te hian ZPM kaihhruai sawrkar siam an tum tih an sawi hnuah District Council & Minority Affairs Minister Robert Romawia Royte chuan an party MDC te hian MNF an chhuahsan leh dawn lo tih a sawi a. DC&MA Minister-in Doordarshan palai a hrilh danin, niminpiah-a CADC CEM hoa MDC 15 ten an party chhuahsan an tum tih an hriat velah Chief Minister hoin theihtawpin hma an la nghal a, nimin-a thutlukna an siam angin CADC-a MNF MDC te chuan MNF ah an awm zui zel tur thu an sawi tih a sawi a ni.

MNF President leh Chief Minister Zoramthanga pawhin nimin vek khan Social Media lama a Account-ah hemi chungchang hi tarlangin, Rasik Mohan Chakma leh CADC a MDC-ten MNF party a rinna an nghah thar leh avangin lawmthu a hrilh a. MNF a rinna an nghah thar leh chhan hi thil ropui tak a nih thu leh MNF party mite zawng zawngin an lo lawm thu leh an hun lo awm zel tura a duhsakna a hlan thu te a tarlang a ni.

Nimin lama tarlan tawh angin Chakma Autonomous District Council (CADC) CEM Rasik Mohan Chakma leh MDC dang 17-te chuan September ni 29 khan Chakma District MNF President hnenah MNF party a an nihna chelh theuh leh party member an nihna atanga an ban thu an hming ziak hnanin an pe a. MNF General Hqrs. President hnenah a copy an pe bawk a. CADC-a MNF sawrkar namthlu a ZPM sawrkar din an tum thu hi an puang bawk a ni. AIR Aizawl in a tarlan danin hetianga an lungawi loh chhan ber hi Tuichawng Bial-a MNF Candidate tur chungchang niin a lang a, hei hi engtin nge an chinfel tih erawh hriat ala ni rih lo thung.