Economics & Statistics Deptt. kum 50-na lawm

Mizoram sawrkar-a Economics & Statistics Department in kum 50 an tlin lawmna pui ber chu nimin khan Aizawl-a Directorate of Economics & Statistics Conference Hall-ah neih a ni a, he hun hi Chief Secretary Dr. Renu Sharma chuan khuallian niin a hmanpui a ni.

Directorate of Economics & Statistics kum 50-na an hmang thei chu a lawmpui thu Chief Secretary chuan sawiin, Statistics leh a kaihhnawih zawng zawngah Nodal Agency an nih avangin tan la zel turin thawktute chu a fuih a. Department-in Theme-a an hman lai 'One State One Statistic' chu a pawimawh thu sawiin, State-in data dik kan neih zel theih nan a hun tak, rintlak, dik bawk si kan neih theih nan Department-a thawktute mai bakah Sawrkar Department dang zawng zawngte, Tlawmngai pawl leh pawl dangte Statistics tha kan neih theih nana tan la theuh turin a sawm a. “Statistics tha chuan hmasawn nana ruahmanna (Developmental planning) atan leh hmalam atana Policy siam nante a pui nasa em em a, data tha leh dik tel loin hmasawnna hian kawng dik a zawh mumal thei lo hial ang,” a ti bawk.

Chief Secretary hian hian Jubilee hriatrengna lungphun hawngin Photo Gallery-a thlalak hlui leh Office khawl hman thin thenkhatte enhona hun neih anih bakah Statistical Handbook Mizoram, 2022 leh Meteorological Data of Mizoram, 2022 chu a tlangzarh nghal bawk.

Economics & Statistics Department hi March 1, 1973-ah Office hran, enkawltu hran neiin chuta tang chuan hmalam panin a kal zel a. State chhunga Official Statistics leh data te vawngthatu niin August 19, 2008 atangin State chhunga Statistics leh a kaihhnawih hna reng rengah Nodal Agency atan Directorate of Economics & Statistics hi Mizoram Sawrkar chuan a puang ta a ni.