Congress Party chuan Mizote Sakhua, Hnam leh nunphung a humhim dawn - Rahul Gandhi

Indian National Congress (INC) hruaitu Rahul Gandhi chuan zan khat riak turin nimin khan Mizoram a rawn thleng a, Aizawl Chanmari kawn atanga Raj Bhavan bul thleng kawng zawhin Congress Party chuan Mizote Sakhua, Hnam leh nunphung a humhim dawn tih a sawi.

Ram chhung hmun hrang hrangah Congress Party-in Rahul Gandhi ho hian ‘Bharat Jodo Yatra’ neiin nimin-a Aizawl-a Rahul Gandhi ho a kawng zawh ah hian Rahul Gandhi hi Congress Party bakah mipui tam takin zuiin Zarkawt-ah Congress hruai hlun Lal Thanhawla pawhin lo hmuakin, kawng tluanin mipui tam takin an lo chang a. Mipuite thla lakpuiin kawng lakah hian mi hrang hrang a kawm bawk a ni. Aizawl Raj Bhavan bula kawngzawh kharna neih ah Rahul Gandhi chuan Mizo thalai tam tak te hna an neih loh thu leh hei hian ruihhlo lamah thalai te pawh a hnuklut tih mithiamten an hrilh thu a sawi a. Kawng a chhiat nasat thu te, hei hian ram ei leh bar kawnga hmasawnna nasa taka a nghawng thu te a hriat thu sawi bawkin Congress Party chuan hmasawnna tur hmathlir tha tak tam tak a neih thu a sawi a ni.

Rahul Gandhi chuan, Congress duh ber chu mi tinte chunga zahngaihna te, ngilneihna te, inngainatna lantirte a nih thu sawiin, Congress a sawrkar chuan Mizo hnam zia, nunphung leh Sakhua humhim a ni dawn a, chu chu thil dang zawng zawng aia pawimawh a nih thu sawiin, Mizo hnam nunphung, Sakhua leh Tawng te tihchhiat a nih chuan India pawh tihchhiat a ni tihna a nih tur thu a sawi a. Mizorama inthlanpui lo awm tur chungchangah Rahul Gandhi chuan, kum 5 chhunga rorellai sawrkarin a thil tih ngaihtuah turin mipui a sawm a, MNF sawrkar chuan kum 5 an sawrkar chhungin hna thar 2000 chauh a la nia sawiin, hmasawnna ruhrel dinte pawh a tha lo hle a, ram ei leh bar pawh a chhe hle, a ti a, State danga Congress sawrkarna-ah erawh hmasawnna an thlen mek a, mi rethei leh hmeichhia te tan ruahmanna tha an siam bakah damloh inenkawlna Scheme tha tak an pe thei tih a sawi a, Congress an sawrkar chuan hmasawnna leh Hnam leh Sakhaw humhim an tiam tih a sawi bawk.

Rahul Gandhi-a'n Chanmari atanga Treasury thleng ke a kawng a zawhnaah hian MPCC President Lalsawta lehhruaitu dang ten an tawiawm a, mipui engemawzatin kawng sirah lo hmuakin, ban vaiin an lo lawm a, kawngsir ah Hnam Lam te an lo entir bawk a ni.

Rahul Gandhi hian Vawiin chawhma lam hian Congress party hruaitute a kawm dawn bakah thuthar thehdarhtute a kawm dawn bawk a, chhun dar 12:00-ah Aizawl chhuahsanin Lunglei a pan anga, Vantlang inkhawm a neih zawhah Mizoram a chhuahsan dawn a ni.

Comments

Popular News (Last 30 Days)

LPG man bithliah thar