Assembly Inthlanpui neih tur hriattirna tichhuakin chuh tumte tan hming pekluh hun hawn a ni
Mizoram Legislative Assembly Inthlanpui neih tur atan hian Zirtawpni (Oct. 13, 2023) khan hriattirna tihchhuah niin Bial tinah Inthlan chuh tumte tan hming pekluhna hun hawn nghal a ni a, hemi ni hian Serchhip District Election Officer David Lalthantluanga chuan Serchhip DC Meeting Hall-ah thuthar thehdarhtute kawmin Section 31 of Representation of Peoples’ Act 1951 hmangin RO ten hriattirna an tihchhuah thu leh Candidate te tan Oct. 13, 2023 chawhma dar 11:00 atangin Nomination File tan nghal theih a nih thu leh Nomination file theih ni hnuhnung ber October 20, 2023 thlengin Office chawlh ni tih lohah chuan chawhnu dar 3:00 thleng Nomination hi file theih a nih thu a sawi a ni.
He inthlanpui neih turah hian District Election Officer, Serchhip chuan inbuatsaihna hrang hrang a kalpui thu sawiin, kumin October 1-a kum tling chin te lain 2nd Special Summary Revision of Photo Electoral Roll 2023 chu neih a nih thu leh Serchhip District-ah vote nei mipa 26,265 leh hmeichhia 27,887, an vaiin mi 54,152 bakah Service Voter 413 an awm thu a sawi a. Heng mite Vote thlakna tur hian Serchhip District -ah Polling Station 88 awmin heng zinga 38 chu khawpui (Urban) a dang 50 chu thingtlang (Rural)-a awm anih thu DEO chuan a sawi a. Assembly Constituency tinah Hmeichhia-in an vil Polling Station (Pink Polling Station) 2 theuh neih tum niin Tualchhuak hmanraw hmanga siam leh zia tarlanna ‘Unique Polling Station’ pakhat tal a awm dawn thu a sawi a. ECI thupek angin Critical Polling Station zawng zawngah leh Polling Station awm zawng zawng zatve (50%) aia tlem lovah Webcasting tih tum a nih thu a sawi a. PwD Voters leh kum 80 chunglam (Senior Citizens) te tan In lama Vote an thlak theihna turin ‘Postal Ballot/Home Voting Facility’ kalpui tum a nih thu a sawi bawk a ni.
District Election Officer chuan Election-a Candidate te sum hman dan ngun taka vil turin Election Expenditure Monitoring (EEM) din a nih thu sawiin, Assistant Expenditure Observer, Flying Squad Team (FST), Static Surveillance Team (SST), Video Surveillance Teams (VST), Video Viewing Teams (VVT), Accounting Teams (AT) leh Media Certification & Monitoring Committee (MCMC) te din a nih tawh thu a sawi a. Election laia Media hrang hrang tangkai taka hman a nih theih nan leh Media mite nen thawhhona tha a awm theih nan Media Centre chu DIPRO Office, Serchhip-ah siam a nih thu sawiin, District Level IT Team dinin kawng hrang hranga hmalakna kalpui a nih thu a sawi bawk.
Inthlanpui neih hun tur puan a nih atanga Model Code of Conduct (MCC) hman nghal a nih thu leh Candidate te, Political party te leh sawrkar hnuaia awm zawng zawng ten an zawm tur a nih thu pawh DEO chuan sawiin, MCC bawhchhiatna chu khawng taka umzui an nih dawn thu leh tun thlengin MCC bawhchhia report erawh ala awm loh thu a sawi a. Tun inthlanpui-ah hian ECIL siam M3 Model thar ber EVM/VVPAT hman a nih dawn thu pawh sawiin, First Level Checking (FLC) tihfel tawh niin EVM te hi Strong Room-ah dahthat a nih tawh thu a sawi bawk.
Serchhip SP MS. Dawngkima chuan mipui ten an chhia leh tha hriatna hmanga Vote an thlak theihna tur tibuai thei veng tura hma an lakna hrang hrang he hunah hian sawiin, hemi atan hian Serchhip District-a Police awmsa in an daih loh avanga Armed Police chahluh belh an nih thu a sawi a. Dan leh thupek keng-kawhtute theihtawp-a tawiawm turin mipuite chu a sawm bawk a ni.
Comments
Post a Comment