IG (Prison) in Serchhip District Jail a rawn tlawh

Mizoram sawrkar-a Inspector General of Prison R. Lalremsanga chuan Zirtawpni khan Chhiahtlang-a Serchhip District Jail tlawhin Jail tang te mamawh leh Jail Building siamthat ngai te a enfiah a, a tul anga hmalak a nih tur thu a sawi.
Serchhip District Jail tlawhtu IG (Prison) hian Serchhip District Jail chhunga Ward hrang hrang leh Office te tlawhin hemi hnu hian District Jail Superintendent C. Lalbiaktluanga kaihhruaiin District Jail Conference Room-ah thawktute nen an inkawm a, he hunah hian IG (Prison) chuan Jail tang te harsatna te hriatthiam saka hmangaihna nen enkawl an pawimawh thu a sawi a. Jail tang te pawh an chhuah hnua eizawnna tha tak an neih theihna turin Jail chhungah lumeh leh Handloom zirna te dah tura hmalak a nih thu a sawi bawk. Hei bakah hian IG (Prison) chuan Jail hrang hrangte chu hnathawh that lamah inelna tur buatsaih a nih tur thu sawiin, Jail tang rintlak deuh (Convict Prisoners) ten Open Jail pawh buatsaih tum a nih thu a sawi bawk.

Tun dinhmunah Serchhip District Jail-ah hian tang mipa 53 leh hmeichhia 3, an vaiin mi 56 an awm mek a. Serchhip District Jail tlawhtu IG (Prison) hi Lalramzauva AIG (Prison) chuan a tawiawm a ni.