‘Ambush - A war story’ Film CM in a tlangzarh

Chief Minister Zoramthanga chuan nizan hmasa khan Leitlang Pictures siam ‘Ambush, A war story’ chu MZU Auditorium-ah a tlangzarh.

He film tlangzarhna hunah hian Chief Minister chuan Ambush film chu a hming mai pawhin a lung a tihlen thu sawiin, Underground a an awm lai behchhan film an lo buaipui ve tawh dan leh film siam hautakzia a lo hriat ve tawh thute a tarlang a. Rambuai film tha tak tlangzarh tur a awm ta chu a buatsaihtute an chhuanawm hle a, thangthar ten kan nu leh pa, kan pi leh puten ram chhan nana an lo tawrh nasatzia te kan hmuh theih phah dawn a ni, a ti a. Film industry lamah Mizoten hma kan sawn zel chu a lawmawm a, hmalam hun eng tak pawh kan nei tih hriaa nasa zawka bei zel turin a sawm bawk a ni.

He hunah hian Film Director Mapuia Chongthu chuan Ambush- A war story film an siam chhan leh an buatsaih dan tlangpui a tarlang a. “Mitin in tui zawng leh tum kan nei thin, kei pawhin he film siam duhna hi kum sawm kalta atang tawh khan ka nei a, mahse sum leh pai a duh hautak avangin tlin ka inti rih lova. Tlem lai khan Serchhip-ah thawhpui tur tha tak mai, Rambuai History lama Doctorate Degree nei Dr. Zarzosanga ka chhar hlauh mai a. A ni’n script tha tak min ziah saka a bul kan tan thei ta a ni,” a ti a. Rambuai hre pha lo thangthar tam tak an awm tawh avangin he film hi entertainment rilru ringawt pua siam a ni lo tih pawh sawiin, “Rambuai chanchin inzirtirna film pawimawh tak ni ah ka ngai a ni,” tiin Chief Minister meuhvin a tlangzarh sak theih avang lawmthu a sawi bawk.

He film-ah hian lemchan thiam mi 70 vel an inlan a, Mizoram a Film siam tawh zinga sum sen sang ber nia sawi niin darkar 2:15 a thui a ni a, Serchhip leh a chhehvel ah te pawh he Film hi an chang a ni.