Zirtirtute Ni puala THUCHAH

Zirtirtute Ni puala THUCHAH

ZIRTIRTUTE NI vawi 62-na pualin Serchhip District mipuite chibai ka buk a che u.

Vawiin hian Serchhip District chhunga Zirtirtu hna thawk mek te leh Pension tawh zawng zawng zahna chibai ka buk che u a. Kan ram leh kan hnam hmasawn zelna tur innghahna bulpui, kan ram hruaitu la ni turte chhertu leh enkawltu, rim tak leh thahnemngai taka he hna ropui ‘Zirtirtu hna’ thawktu zawng zawngte he Zirtute Ni pual hian chawimawina leh duhsakna ka hlan che u a ni.

India ram President pahnihna, Dr. Sarvepalli Radhakrishnan, Zirtirtu ropui leh mithiam chungchuang pianchamphaphak pualin September ni 5 hi 'ZIRTIRTUTE NI' atan hman a ni a. He ni hi kum 1962 atangin India ram pumpuiah urhsun taka hman thin a ni. India ram Prime Minister hmasa ber Pu Nehru-a’n "Zirtirtu ropui ber" tia a lo sawi, khawvel pa lar Bertrand Russel-a meuh pawhin "Hun khirh lai ber pawha remhre chungchuang, India chawimawitu” a tih hial khawpa ropui Dr. S. Radhakrishnan pianchama he ni kan hmang hi a inhmeh hle a ni.

Serchhip District huamchhungah hian ram pum huapa chawi-mawina dawng phak Zirtirtu tha thlanchhuah kan lo nei tawh thin a. Kumin Independence Day-ah pawh khan Govt. East Lungdar Primary School-II Headmaster Pu Lalengliana Chawnghlut chuan he chawimawina hlu tak - State Award for Teachers lawmman a dawng a, kan chhuang tak meuh a ni. District Award to Teachers dawngtu mi pathum kan nei bawk a. Anni hnenah hian lawmman sumfai Rs. 5000, Silver Medal leh chawimawina thuziak hlan an ni dawn bawk a ni.

Kumdanga kan lo tih thin ang bawkin zirtirtu natna khirh tuar te tanpui nan sawrkar School leh Private School a thawk Zirtirtu zawng zawngin Rs. 200 thawh ni se tiin State Working Committee chuan a rel a. He fund hi kan zavaia ta a ni tih hre thar leh ila. Serchhip District hi NTFW Fund thawh kawngah a titha ber pawl kan lo ni tawh thin a, kuminah pawh he Fund atan hian thahnemngai taka kan sum leh pai te thawh turin zirtirtute ka sawm nghal bawk che u a ni.

A tawp berah chuan, Zirtute Ni 2023 pual hian in zavaiin chibai ka buk nawn leh che u a. Zirtirtute hi ram leh hnam, khua leh tui thaa min siamtute an ni tih hriain, zirtirtute zahna leh duhsakna hlan chungin Zirtirtute Ni hi hlim takin i hmang theuh ang u.


- David Lalthlantluanga,

Deputy Commissioner,

Serchhip District, Serchhip

Comments

Popular News (Last 30 Days)

Bawngchawm tlang khualbuk rawktu nia hriat mi 2 man