Ram neitu ten hnathawktu te dangin sawrkar nen an inbia

National Highway-54 laihzauh leh siamthat hna thawh mekin Serchhip khawpui a helna tura ram neitute chuan Inrinni atang khan hnathawktute dangin nimin khan District thuneitute nen inbiakna an nei leh.
National Highway-54 in Serchhip a helna tura ram neitute hian zangnadawmna an lak tur ang te an lak theih loh avangin kumin July 8 atang khan Serchhip Kikawn leh Sailiamkawn bulah te kawngpui an lo dang tawh a, amaherawh chu tun thlenga zangnadawmna an la hmuh tak loh avang hian Inrinni kalta, September 2, 2023 atang khan Serchhip Sailiamkawn bul-ah kawng hi dang tha lehin hei hian Serchhip Sailiamkawn bula Lei dawh hna thawktute pawh hna thawk thei lovin a siam a, helai kawng-a kaltlang tur, Hriangtlang khua leh feh turte erawh dan ni lovin Duty pawh an indah nghal a ni.

Hetianga kawngpui an dan leh tak avang leh hei hian Lei dawh hna thawk mektute pawh a dan tak avang hian nimin khan Serchhip-a Election Officer Lalrinsanga Hnamte chuan kawng dangtute hi a kawm a, tun dinhmuna sawrkar in hma a lakna te hrilhin, District-a thuneitu sang zawk te an awm loh avangin hmalak zui mai theih a awm loh thu a sawi bakah an kawng dan chu titawp rih turin a ngen a. Ram neitute chuan hei hi an lo ngaih-tuah tur thu sawiin, kawng dan erawh an la titawp rih lo nia thudawn a ni bawk.