Health Department hnuaia hmalakna puangin MSSSCRC din turin inremna ziah a ni tawh

Health and Family Welfare Minister Dr. R. Lalthangliana chuan nimin khan Health Department hnuaia hmalakna te puangin, Zemabawk-ah Mizorama State Super Speciality Cancer & Research Centre (MSSSCRC) din turin Japan International Cooperation Agency (JICA) nen inremna ziah a nih tawh thu a sawi.

Nimin-a Aizawl Press Club-a thuthar thehdarhtute a kawmna ah Health Minister Dr. R. Lalthangliana chuan Mizorama State Super Speciality Cancer & Research Centre (MSSSCRC) din tur chungchang hi sawiin, he Cancer Super Speciality Hospital thar tur atan hian cheng vbc. 700 sen tur a ni tih sawiin, India rama a pui ber pawl leh hmarchhak-a a tha bera chhal theih tur a nih thu a sawi bawk. Health Minister chuan Mizoram sawrkar leh World Bank thawdunna Project, ‘Mizoram Health System Strengthening Project’ chungchang pawh sawiin, he Project hi tih hlawhtlin a nih hunah chuan hriselna kawnga kan State hmelhmang thlak danglam dawrhtu tur a nih thu a sawi a. He Project hnuaiah hian District thar pathum-a CMO Office building sak zawh tawh a nih thu leh District Hospital hrang hrangte cheithat niin, MCON Hostel sak te leh building hluite cheithat hna thawh a ni bawk tih a sawi a. Mizoram State Health Care Scheme leh AB-PMJAY te tihchangtlun nan hmalak mek a ni tih a sawi bawk.

Health Minister chuan Health Department hnuaia hmalakna hrang hrangte tarlangin, ZMC-a damlo khum 140 bawr ni thin chu khum 470 hman theihin a awm mek thu a sawi a, ICU khum 13 kan neih thin pawh 300-ah tihpun niin PICU 10, NICU 25 leh ICCU 7 kan neih thu a sawi a. ZMC-a MBBS 1st Batch ten May 1, 2023 khan Internship an tan tih a sawi bawk.

Khum 12 (ICU 4 leh HDU 8) zel awmna Naupang ICU (PICU) chu District Hospital 6- Aizawl, Lunglei, Siaha, Lawngtlai, Champhai leh Serchhip-ah siam a nih thu sawiin, District Hospital 10-ah RT-PCR Laboratory nei tura hmalak a nih thu a sawi a. Lawngtlai, Siaha, Champhai, Lunglei leh Serchhip District Hospital-ah te cheng nuai 494.20 theuh sengin Trauma Care Facilities dah vek a nih thu leh Serchhip District Hospital sa tura hmalak mek a nih thu a sawi bawk.