Youth 20 Mizoram, Meet on Nationalism, Patriotism & Development kharna CM hovin neih a ni

Youth 20 Mizoram, Meet on Nationalism, Patriotism & Development chu Chief Minister Zoramthanga hovin nimin khan Pachhunga University College Multipurpose Auditorium-ah a kharna hun hman a ni a, Chief Minister chuan, “Nationalism hi hnamdangte va huat te, va ngai theih loh te lam a ni lo,” a ti.

India ramin G-20 Presidency a chelh denchhena hmalakna chi khat Youth 20 Mizoram Meet on Nationalism, Patriotism & Development hi July ni 14 atang khan Mizoram District khawpui hrang hrangah neih niin nimin-a a kharna hun Pachhunga University College Multipurpose Auditorium-a neih ah hian Chief Minister Zoramthanga chuan kan pi leh pu ten Mizoram an luah dan leh kan ramah Missionary lo kala Kristian ram kan nih dan te bakah rambuai kan tawh chhoh dan te sawiin, “Mipui, kohhran leh tlawmngai pawl hrang hrangten inremna an beisei angin 1986-ah inremna kan nei a, ralthuam dahin Politics dawhkanah zawk ram leh hnam hmasawnna hnathawh leh Mizo Nationalism kalpui kan thlang ta a ni,” a ti a. A tir atanga Vawiin thlenga Mizo Nationalism an la kalpui reng thu pawh sawiin, “Nationalism hi hnamdangte va huat te, va ngai theih loh te lam a ni lova, Pathian in min pek ram leh hnam humhalha, dinchhuahpui hi a ni,” a ti a, “He ram leh hnam humhim zel hi mitin mawh a nih rualin thalaiten mawhphurhna pawimawh em em kan nei tih hi i hrereng ang u,” a ti bawk.

Youth 20 Mizoram kharna inkhawm kaihruaitu Dr. Lalrozama IAS, Secretary to the Govt. of Mizoram chuan ram leh hnam hmangaihna thinlung te, inpumkhatna tha kan mamawh zia te thalaite thinlungah a thara tuh beiseiin Youth 20 Mizoram programme hi kalpui a nih thu a sawi a. Aizawl District-ah intawhkhawm vawi nga leh District dangah vawi sawm buatsaih a nih thu a sawi a. Khual zahawm Sports Minister Robert Romawia Royte pawhin G-20 chungchang leh chumi hnuaia Youth-20 Movement neih a nih dan te, Mizo thalaite mamawh tak thalaite ngaihtuahnaa nationalism leh patriotism tuhngheta hmasawnna pawimawhzia inzirtir a tul thute a sawi bawk.