Rampum huapa hriselna kawnga hmalakna 'Ayushman Bhava' Serchhip District-ah a hawnna neih a ni

Rampum huapa hriselna kawnga hmalakna, 'Ayushman Bhava' chu rampum huapa a hawnna neih a nih hnuah Serchhip District-ah pawh nimin chawhnu khan District Bawrhsap David Lalthantluanga hovin a hawnna neih a ni a, Serchhip District chhunga CHC leh PHC-ah te pawh a hawnna hun hi hman a ni bawk.

Serchhip District-a 'Ayushman Bhava' hawnna hun Serchhip CMO Conference Hall-a neih ah hian District Bawrhsap David Lalthantluanga chuan 'Ayushman Bhava' hnuaiah hian ni 15 chhungin hriselna kawnga hmalakna hrang hrang bawhzui a ni dawn tih sawiin, he hmalakna hi Scheme thar hlak ni lovin hriselna kawnga hmalakna hrang hrangte chak lehzuala bawhzuina tur a nih thu a sawi a. Kum 2015 khan UN hnuaia ram 198 ten kum 2030-a tih hlawhtlin turin kawng 17-a thawhhona tur SDG an lo tawh thu leh India pawhin hetah hian hming ziakin he thawhhona hnuaia hmalakna ah hian Theme 9 a awm thu leh chung zinga tel, Healthy Village zingah chuan 'Ayushman Bhava' hi buatsaih a nih thu a sawi a. He chawlhkar hnih chhung hian hriselna kawnga thawktu sawrkar mi leh sa te chuan mipuite chu pan chilhin hma an lak dawn thu a sawi a ni.

Serchhip District-a 'Ayushman Bhava' hawnna hun hi Serchhip Sr. CMO Dr. LP. Malsawma chuan kaihruaiin Dy. CMO Dr. Lallawmkimi Chhakchhuak chuan 'Ayushman Bhava' hnuaia September 16, 2023 atanga October 7, 2023 thlenga hmalakna tur hrang hrang a tarlang a. Hemi chhung hian Thawhlehni apiangin Golden Card la nei lo te tan a thlawna siam theih a nih dawn thu te, Health & Wellness Centre hrang hrangah Inrinni apiangin Ayushman Mela neih a nih dawn thu leh October 2-ah khaw tinah Ayushman Sabha neiin Vantlang inkhawm neih a nih dawn thu te a sawi bawk a. India rama mihring cheng zinga a tam zawk te chu thingtlang-a khawsa an nih thu leh Healthy Village kan nih theihna tur chuan heng mi zawng zawngte tuamchhuaka hmalakna chu thil pawimawh leh tul a nih thu a sawi bawk a ni.

Nimin-a he hunah hian Serchhip District chhunga TB umbona kawnga hmalakna, Nikshay Mitra hnuaia TB vei ten chawtha an hmuh theihna tura sum leh pai thawhtute hnenah chawimawina hlan a ni bawk a. Serchhip khawpui chhunga Mizoram Rural Bank (MRB) Branch pathum- Serchhip, New Serchhip leh Chhiahtlang MRB Branch te bakah mimal pahnih te hnenah chawimawina hi hlan niin TB vei mi pakhat tan thla khat ah Rs. 600/- zelin thla 6 chhung an pe thin a ni.

'Ayushman Bhava' hawnna hunah hian Health Department-a thawktute leh tlawmngai pawl hrang hrang aiawhte an tel a ni.

• Ayushman Bhava Campaign chhung hian Ayushman Aapke Dwar 3.0 kalpui tur niin AB-PMJAY Ayushman Golden Card nei thei tur zawng zawng ten an neih theihna turin a thlawna inziahluhna hun (Golden Card siamna hun) buatsaih a ni ang.

• Sub-Centre leh sawrkar damdawiin zawng zawngah Health Mela- Free Clinic huaihawt thin a ni dawn a. Kum 30 chunglam tan Non-Communicable Diseases (NCD) test  (Thisen Sang, Zunthlum, Ka chhung cancer, chhul hmawr cancer leh hnute cancer) a tam thei ang ber neih tur niin TB leh Malaria Screening te, ABHA Health ID siam runpui te, Nu leh naupai check runpui leh Vaccine pek runpui te neih a ni ang.

• Health & Wellness Center chi hrang hrang (Sub-Center /PHC/UPHC/UHWC) ah te hriselna chungchanga inzirtirna zau zawka neih tur niin, District Hospital hrang hrang ah Blood donation Camp neih a ni dawn a. Thih hnua Mit donate duh te zawn beihpui thlak a ni dawn bawk a ni. Hemi rual hian faina leh thianghlimna chungchanga campaign te leh Cleanliness drive te neih tum a ni.