Mizoram in W&C Help Desk Toll Free kalpui hmasa

Social Welfare & Tribal Affairs Minister Er. Lalrinawma chuan Women & Child Help Desk Toll Free chu India rampum-a kalpui hmasa ber an nih thu a sawi.

Nimin khan Aizawl Press Club-ah thuthar thehdarhtute kawmin Minister Er. Lalrinawma hian a Department enkawl a hmalakna hrang hrangte a tarlang a. Social Welfare Department chu Directorate pahnih ah thenin Social Welfare & Tribal Affairs leh Women and Child Development Directorate-ah siam a nih thu a sawi a. Women and Child Development hnuaiah hian Mission Shakti kalpui niin hmeichhia te himna atan leh hmasawnna kawnga an hnufual bik lutuk loh nana sawrkar duan a nih thu a sawi a. Hemi hnuaiah hian Hmeichhe humhimna leh venhimna atan Help Line siam a nih thu leh Women & Child Help Desk kaltlang hian July 2016 atanga July 2023-ah tanpuina mamawh phone tu mi 1,4,947 an awm tih leh thubuai 80% vel chinfel a nih thu a sawi a ni.

Saksham Anganwadi & Poshan 2.0 kalpui mekin, a tum ber chu naupang, tleirawl, nu naupai leh naupawm chawtha tlachhamten mumal zawka chawtha an hmuh theih nan leh chawtha an ei theih nana tanrual leh, hriselna leh hrisêlna lama hmasawn zelna atana thil awmsa leh neihsa te tihchangtlun, tihlar leh chawisan te a nih thu Minister chuan a sawi a. ICDS Projects 27 awmin Anganwadi 2,244 a awm thu leh Anganwadi-ah hian thawktu 2,244 leh helper 2,244 awmin, naupang leh Nu naupai lai mi 1,60,000 chuangin an chhawr tangkai mek thu a sawi bawk.

Saksham Anganwadi and Poshan 2.0’ hnuaiah hian Scheme pathum a awm thu pawh Minister chuan sawiin, heng te hi Anganwadi Services (Integrated Child Development Scheme-ICDS) hnuaiah Chawtha tihpun, Pre-School tih changtlun, Chawtha leh hriselna lam inzirtir, Hri danna lak, In check-up leh naupiang hlim atanga thla ruk, nu naupai leh naupawmte'n Wadi Center kaltlanga Health Department hmalakna kawng hrang hranga an chhawr tangkai theih nana hmalak a nih thu a sawi bawk.

Social Welfare & Tribal Affairs hnuaia hmalakna chi hrang hrang zingah National Social Assistance Programme (NSAP) hnuaiah Scheme 4 kalpui niin Indira Gandhi National Old Age Penson Scheme (IGNOAPS) atangin kum 60 leh 79 inkar tan 300/- (Central Share 200 + State Share 100) pek niin kum 80 leh a chunglam te tan Rs. 600 (Central Share 500+ State share 100) pek thin an nih thu a sawi a. Tunah hian kum 60 leh 79 inkarah mi 17,765 leh kum 80 chunglam mi 7,448 hnenah pek a nih thu a sawi a. Indira Gandhi National Widow Penson Scheme (IGNWPS) hnuaiah mi 2310; Indira Gandhi National Disability Penson Scheme (IGNDPS) hnuaiah mi 742 leh National Family Benefit Scheme (NFBS) hnuaiah kumtin mi 197 te tanpuina pek an nih thu a sawi bawk.