YMA CCC thukhawm in YMA Inkhawmpui Lian a ngaihtuah turin rawtna lut zingah 8 an pawm

YMA Rorelna sang ber dawttu, Central Co-ordination Committee (CCC) chu nimin khan thukhawmin kumin a YMA Inkhawmpui lian-a ngaihtuah tura rawtna lut hrang hrangte an thlifim.
Nimin-a CCC thutkhawm Central YMA Hall, Tuikhuahtlang-a neih hi Central YMA President R. Lalngheta chuan kaihruaiin kumin October 24-26 chhunga YMA Inkhawmpui Lian, vawi 74-na Biate-a neih tura Agenda rawtna lut hrang hrangte chu thlirho a ni a. Rawtna lut te atangin YMA Khawih 6 leh Sawrkar Khawih pahnih te chu YMA Inkhawmpui lian-a ngaihtuah turin chhawpchhuah nise an ti a. CCC thukhawm in YMA Inkhawmpui lian-a ngaihtuah tura a pawm YMA Khawih zingah hian ‘Environment humhalhna kawngah hian Central YMA-in tun aia chak zawkin hma la rawh se’ tih te; ‘Hmun hrang hranga awm Zofate kan insuihkhawm leh zual theih nan tun aia chak zawkin Central YMA-in hma la rawh se’ tih te; ‘Social Audit hi tha zawka kalpui a nih theih nan leh Mipuiin kan hlawkpui theih nan hmalak ni rawh se’ tih te; ‘YMA ten sawrkar Department kan thawhho puite hi zirchian a, thawhpui awm chauh thawhpui tawh nise’ tih te; ‘Environment clearance tello chuan Mizoram chhungah hmasawnna hnathawh a nih tawh loh nan Central YMA-in hma la rawh se’ tih leh ‘Tuihna humhalh kawngah YMA-in uar zawk leh nasa zawk a hma lak ni rawh se’ tih te a tel a ni.

Sawrkar Khawih pahnih Inkhawmpui lian-a ngaihtuah tura pawm tak te hi ‘Quality Education a awm theih nan sawrkar-in tun aia chak zawkin hma la rawh se’ tih leh ‘Armed Battalion pakhat tal Mizoram sawrkar-in din belh leh rawh se’ tih te a ni a. Heng bakah hian rawtna lut dang 8 te chu Inkhawmpui Liana chhawpchhuak lovin CEC ten lo bawhzui se an ti bawk.

CCC thukhawm hian Chhiatni Thatni Kaihhruaina ennawn rawtna chu YMA Inkhawmpui lian a ngaihtuah tura chhawpchhuah nise an ti a, YMA Kumpuan atana rawtna lut atangin ‘Ram leh Hnam Humhalh’ leh ‘Ruihhlo Do’ tih te chu Inkhawmpui Lian-ah buk a ni bawk ang.

Nimin-a CCC thutkhawm ah hian Central YMA General Secretary Prof. Lalnuntluanga chuan an hmalakna hrang hrangte a tarlang a, he hunah hian Member mi 217 telin Serchhip Sub-Hqrs. YMA atang pawhin mi 5 an tel a ni.