World Bamboo Day, 2023 hmangin Mau chin leh hman kawnga hma la tha chawimawi an ni

World Bamboo Day, 2023 chu nimin khan Horticulture Department buatsaihin Aijal Club-ah hman a ni a, he hun hmanpuitu Bamboo Development Board Vice Chairman Dr.K. Pachhunga MLA chuan Mau chu awlsam taka kan neih mai theih a nih avangin hman tangkai kan zir a ngai tih a sawi.

World Bamboo Day puala inkhawm ah hian Bamboo Development Board Vice Chairman Dr. K. Pachhunga MLA chuan Mizoram chu Mau tharchhuahna kawngah kan hausa tih sawiin, ram dang ten an neih ve mai mai theihloh awlsam taka kan nei leh kan bulhnai maia awm a ni chu kan vanneih hle tih a sawi a, a hman tangkai kan zir a ngaih thu leh Mau hmanga eizawnna atangin sum tam tak lakluh theih a nih thu a sawi a. Mizoram in kan mamawh chu technology a nih thu sawiin, “Mau chu Pathian in variety tha tak tak min pe. Mizo chhungkaw tinin Mau kan hmang tangkai hle. Mautuai kan ei zawng zawngte hi a man a tamin ka ring khawp mai,” tiin kan economy-ah nasa taka min puih thu a sawi bawk.

Commissioner & Secretary Horticulture Department K. Lalthawmmawia kaihhruai he hunah hian State Bamboo Mission, Horticulture Department hnuaia Furniture Training zo tawhte hnenah Training Certificate hlan niin Mau chin leh mau hmanga thil siamna kawnga lawmman sem nghal a ni a. Best Individual Bamboo Plantation atan Lalnghakliana, Hmunpui, Mamit District chu thlan niin Best Bamboo Cluster Plantation atan Saiphal Zau, Hmumpui Ram Mamit District thlan niin, Zau neitu Ex-MNA Multipurpose Cooperative Society Ltd. hnenah chawimawina hlan an ni a. Best Bamboo Entrepreneur atan C. Lalropuia (BT. Enter Pvt. Ltd, Durlang) thlan niin Bamboo Charcoal Briquette siamchhuah leh hralh chhuah kawnga hma la tha niin Best Bamboo Demo-Plot atan Horticulture Centre, Zawlnuam District chu thlan a ni bawk.

World Bamboo Day, 2023 pual hian Exhibition neih niin Rua leh Mau atanga siam-chhuah thil chi hrang hrang te pholan a ni a. Exhibition a tel tur hian National Institute of Design, Bengaluru leh Ahmedabad atangin Designer leh Master Trainer te an tel a ni.