Minister in ‘Thiam bul tanna bu’ a tlangzarh

Mizoram pum a naupang kum 6 hnuailamte’n kawng engkim a hma an sawn theih nana siam ECCE (Early Childhood Care and Education) Curriculum thar ‘Thiam bul tanna bu’ chu nimin khan Social Welfare & Tribal Affairs Department Minister Er. Lalrinawma chuan a Pisa-ah a tlangzarh.

‘Thiam bul tanna bu’ tlangzarhna puala inkhawm neih ah SW&TA Minister chuan naupan tetlaia thil hriat hi a nghetin, puitlin thleng pawha kan hriat loh laia kan nun kaihruaitu a nih avangin naupan tetlai-a zirtirna hi ngaihpawimawh a tul thu a sawi a. Tuna Curriculum kalpui mek chu kum 2014 atanga hman tan niin, kan hmanna a lo rei tawh avang te, khawvel danglam zelah siamrem ngai a awm ve zel avang leh NEP a lo pian tak avangin Curriculum thar, SCERT leh School Education Department-te nen a thawhhona a zarah, ‘Thiam Bul Tanna Bu’ tia hming phuahin revised (Siamthat) a lo nih tak thu a sawi a ni.

Minister Er. Lalrinawma chuan Department of Women & Child an nih angin naupang hmasawnna, naupang thanlenna (Child Development) chu an Department hmalakna pawimawh berte zinga mi a nih thu pawh sawiin, Anganwadi Centre 2244-ah te, Block/Project 27-ah CDPO leh CO-te vilna hnuaiah leh, District tinah DPO-te kaihhruainain ngawrh tak a kalpui a nih thu sawiin, thawktute chungah lawmthu sawi chungin theihtawp chhuah zel turin a chah bawk.

Nimin-a he hun hmanna ah hian Rastriya POSHAN Maah 2023 hman mek hnuaiah ‘Poshan bhi padhai bhi’ chungchang inhrilhhriatna hun hman nghal a ni bawk.