VLT&EAS Control and Command Centre hawngin KM 23-a thui IWT Project atan lungphum phum a ni bawk

Transport Minister TJ. Lalnuntluanga chuan Vehicle Location Tracking & Emergency Alert System (VLT&EAS) Control and Command Centre chu nimin khan hawngin Khawthlangtuipui leh Tuichawng Lui inkar KM 23-a Inland Water Transport (IWT) Project kalpui tur lungphum a phum bawk.

Directorate of Transport Pisa-a hemi puala inkhawm buatsaih ah Transport Minister TJ. Lalnuntluanga chuan an ramin inkalpawhna tha leh tlawm zawk Inland Water Transport (IWT) Project atana lungphum phum a ni chu lawmawm a tih thu sawiin, Luidung 16, Forest Department-in an humhalh mek thu leh kan ram lui zawng zawngte IWT atan hman tangkai theih ni lo mahse a theih tur lui-ah in sawrbinga hlawhtlinpui turin hmalak zawk nise tih a nih thu a sawi a. Techno Feasibility Survey chu Chhimtuipui-ah pawh kalpui mek a nih thu sawiin, kan ramri buaina avangin he IWT Project hi ngaihpawimawh lehzual a ni, a ti bawk. Nunau chak lo zawkte humhim nan Emergency button leh motor thlen chin Tracking-na hmanrua, Vehicle Location Tracking & Emergency Alert System (VLT & EAS) Control and Command Centre hawn a ni pawh kan ram hmasawnna bul a nih ngei a beisei thu Minister hian a sawi a, “Kan ram tan mellung pawimawh tak a ni a, passenger phur motor driver te'n fimkhur takin an awm phah anga, kan him phah bawk dawn a. Kan Police te pawh hnuchhui nan a pui thei bawk dawn a ni,” a ti bawk.

Kum 2012-a Delhi-a Bus chhunga pawngsualna rapthlak tak thleng ‘Nirbhaya case’ thil thleng avang khan India sawrkar chuan passenger te, a bikin hmeichhiate himna tur ngaihtuahin MoRTH chuan kum 2016 khan Central Motor Vehicle Rules (CMVR)-ah thuchhuah a siam tih Lalmuanawmi, Transport Project Coordinator, NIC, Aizawl chuan sawiin, hemi ang hian Vehicle Location Tracking Device (VLTD) leh Emergency Alert Button chu passenger phur motor ke pali leh a chung lam nei, January ni 1, 2019 hnulama register-ah vuah vek tura tih a ni tih a sawi a. VLT&EAS chuan Two Wheeler leh Three Wheeler (Auto Rickshaw) a huam lo tih sawiin, Mizoram tiamin State parukah India ramah hman a nih tawh thu te, he Project hnuaia hian NICSI (National Informatics Centre Service Inc.) Ministry of Electronics & Information Technology, Govt. of India kaltlangin thawktu mi 15 dahin Command and Control Centre-ah hian ni 1-ah darkar 24 chhung thawktu an awm tur thu te a sawi bawk.

He Project hian thil thum pathum (3) neiin Hmeichhia leh naupangte passenger phur motor a an him zawk te; Passenger Vehicle-a harsatna tawk te'n awlsam taka tanpuina an koh theih leh Passenger Vehicle awmna hmun awlsam taka hriatna leh chhui zung zung theih te a ni a. Rang taka Emergency Response Support System (ERSS) Team, Police Department hnena hriattir a nih theih nan bakah Vehicle Location Tracking Device leh Emergency Button te chhui bakah enthlak theihna tur Monitoring Centre siam te a ni.

Lirthei-ah harsatna - pawngsual, insuam/inrawk, accident eng pawh thleng se Panic Button an hmeh veleh Command & Control Centre leh ERSS (Police Department)-ah alert thlengin, harsatna thlenna hmun an chhui chhuakin, hma lak zung zung theih a ni dawn a ni. VLT Device hian Command & Control Centre-ah Motor a nun chuan lirthei dinhmun a thawn reng a. Motor awmna, tlan chak zawng, Signal dawng tha lo, device tihchhiat tum, SIM Card nung tha lo te a hriat theih a ni.

Khawtlangtuipui - Tuichawng Lui Inland Water Transport atana cheng vbc. 22.93 DPR chu sawrkar laipui in pawm tawhin Phase-I ah Rs. 6,17,86,000/- sanctioned niin Rs. 1,23,57,000/- released tawh a ni a. KM 6, Kawrpuichhuah/Thegaduar (Bangladesh border) atanga Tlabung inkar huamin M/S Coastal Consolidate Structure Pvt. Ltd. Vijayawada, Andra Pradesh te'n an thawk ang.

Comments

Popular News (Last 30 Days)

LPG man bithliah thar