Kan ram in harsatna a tawh hrang hrangte hian mahni ke-a din a pawimawhzia min zirtir - Chief Minister

Chief Minister Zoramthanga chuan tunhnaia kan ram in harsatna a tawh hrang hrangte chuan mahni ke-a din a pawimawhzia min zirtir tih a sawi.

Mizoram Engineering Service Association (MESA) Annual General Conference vawi 42-na nimin-a Berawtlang Multipurpose Hall-a neih a hmanpuina ah Chief Minister Zoramthanga chuan tunhnaia kan ram in harsatna a tawh hrang hrangte hian mahni ke-a din a pawimawhzia min zirtir tih sawiin, Pathian in ram tha tak min pe a, kan leilung, boruak leh tuihna te, lei hnuai hausakna chenin mal min sawm nasa hle tih a sawi a. “He ram thatna haichhuak a, hmang tangkai a, mahni intodelh rama chantir turin Engineer ten tam takin mawh kan phur a ni tih kan rilruah awm reng ka duh hle a ni,” a ti a. Vawi leh khatah sang taka thlen theih ni lo mahse hmathlir fel tak nei chunga hma kan lak a pawimawh thin thu sawiin, “Kan hmabak awm mek hi kan Engineer ten keimahni zawnah chonaah ngai ila, midangte pawhin mahni hmazawnah theuh i bei sauh sauh ang u, kan ram tung ding tur hian kan ko ah mawhphurhna a awm theuh a ni,” a ti.

Chief Minister chuan Engineer te chu kan ramin hma a sawnna tura a sulsutute leh a taka thawktute an ni tih sawiin, “Hna lak belh in mamawhna in tarlan te hi kan hriatpui che u a, Service dangten an mamawhna te pawh kan hriatpui hlawm a ni,” a ti a. “Kan hriat vek angin sawrkar hian sum leh pai harsatna nasa tak a tawk a, COVID-19 hripui vang khan tun kum thum chhung hian Central sawrkarin min pek theih tura an ngaih, budget-a dah tura min tih vek tawh; min pek theih leh tak loh hi vbc. 3500 vel a tling phak a ni,” a ti a. Chutiang harsatna chuan min delh avangin sawrkar hna lakah leh kawng dangah pawh an duh leh tum angin an kal thei rih lo tioh sawiin, “Hei hi kan inhriatpui a tul hle a, kan beisei lawk loh harsatna in min chim nasa a ni. Pathian in min khawngaiha hun tha kan nei leh a nih chuan kan beisei leh tum ang takin a tul apiangah nasa zawkin kan la thawk zel dawn a ni,” a ti bawk.

MESA Annual General Conference hi an pawl Vice President Er. H. Zoramliana chuan kaihruaiin he ni hi ‘National Engineers Day’ a nih angin Er. Lalrinmawia, Secretary, Information & Publicity chuan he ni pual hian thuchah a sawi a. An member pension mi 12 thlahna te, an Golden Jubilee an lawm mek kharna te an neih bakah tunhnaia an member boral mi pasarih te sunna hun an hmang nghal bawk a ni.

MESA hi kum 1972 khan member pariat chauh neiin an ding tan a, tunah hian Active Member PWD-ah 144, P&E Department-ah 73, PHE Department-ah 67 leh I&WR Department-ah 16, an vaiin 332 an awm a, Life member te nen Member 363 an awm mek a ni.

Comments

Popular News (Last 30 Days)

LPG man bithliah thar