Tun thla chhunga SEDP sum sem tuma hmalak mek niin Serchhip District-ah a dawng tur mi 4502 an awm

Mizoram sawrkar in Family Oriented SEDP Phase 2-na a kalpui tur atan Serchhip District-a Line Department hrang hrangte chuan tun thla chhunga tanpuina sum hmasa sum turin hma an la mek a. Tun dinhmunah Family Oriented SEDP hnuaiah hian Serchhip District-ah beneficiary 4502 an awm dawn a ni.

Mizoram Deputy Chief Minister Tawnluia kaihhruai SEDP Executive Board Meeting thla hmasa August 24-a neih chuan kumin September thla chhung hian Family Oriented SEDP Phase-2 hnuaia tanpuina dawng tur ten an dawn kim theih dan tur ruahmanna siamin hemi ang hian Mizoram pumah Line Derpartment te chuan hma an la mek a, SEDP Phase-2 hnuaiah hian beneficiary 60,000 awm tura ruahman a ni. Hemi hma kumin August 8-a SEDP Executive Board thutkhawm ah Family Oriented SEDP 2nd Phase-ah hian MLA Constituency tin atanga chhungkua 1,400 thlan kaltlangin hamthatna dawngtu beneficiary 56,000 an awm theih dawn thu leh heng baka chhungkaw 4,000 dangte chu MLA Constituency lian deuah pek belh emaw, a mamawh zual chhungkuate SEDP Governing Board remtihnaa pek tur a ni tih tarlan a lo ni tawh a ni.

Hriat theih chinah Serchhip District-a Assembly Bial pathum atangin mi 1400 aia tam theuh SEDP hnuaia tanpuina dawng tur hian thlan an ni tawh a, Serchhip-a SEDP Line Department hrang hrang ten tanpuina dawng tur list an dawn chinah Serchhip bial atangin 1487; Tuikum Bial atangin chhungkaw 1526 leh Hriangturzo Bial atangin chhungkaw 1489, an vaiin mi 4502 thlanchhuah an ni tawh a ni.

LENKAWL in Serchhip-a SEDP Line Department hrang hrangte a zawhfiahna atanga a lan danin Family Oriented SEDP 2nd Phase-ah hian Line Department 8 zingah AH&Vety Department chu beneficiary ngah ber an ni leh dawn a, Serchhip bial-ah 893, Tuikum bial-ah 998 leh Hrangturzo bial-ah 927, an vaiin beneficiary 2828 an nei leh dawn a, 1st Phase-ah pawh khan beneficiary ngah ber an lo ni tawh bawk a ni. AH & Vety Department hnuaiah hian Vawk vulh thlangtu mi 1796 zet awmin Ar vulh thlang 952 an awm bawk a, Bawnglian vullh thlangtu 31 an awm bakah Sial vulh thlangtu mi 26 leh Kel vulh thlangtu mi 13 an awm bawk a ni.

AH&Vety Department dawt-ah hian Commerce & Industry Department chu beneficiary ngah ber niin beneficiary 833 an nei a, Horticulture Department in beneficiary 492 an nei dawn bawk a ni. Line Department zingah Tourism Department atanga tanpuina dawng tur an awm hriat a ni rih lo a, Sericulture Department hnuaiah beneficiary pathum chauh awmin beneficiary nei tlem ber an ni thung.

Line Deparrtment hrang hrang te hian an Department hnuaia tanpuina dawng turte hi enfel hna thawk mekin Bank Account diklo te enfiah mek a ni a, hei hi tun thla ni 15-ah zawh hman tur niin tun thla, September, 2023 chhung hian tanpuina hi pek tura ruahman a ni. Tanpuina sum hi a thawhkhatna kal-tlang hian beneficiary-ten Rs. 25,000/- theuh an dawng dawn a. Second instalment-ah Rs. 25,000/- theuh pek leh tur a ni ang.