Serchhip District-a Zirtirtu tha thlanchhuah mi 3 hnenah ‘District Award to Teacher’ hlan an ni

Serchhip District chhunga Zirtirtu tha thlanchhuah mi pathum te hnenah nimin khan ‘District Award to Teacher’ hlan an ni a, he chawimawina hian Silver Medal bakah Cash Award Rs. 5000/- leh Certificate a keng tel a ni.
Serchhip District chhunga Zirtirtu tha thlanchhuah te chawimawina hlanna hun hi nimin khan BRC Hall, Serchhip-ah neih niin Primary School Zirtirtu zingah R. Lalmalsawma, Headmaster, Govt. Hmuntha P/S; Middle School Zirtirtu zingah Sangchhawni, Headmistress, Govt. Central M/S, Chhingchhip leh High School Zirtirtu zingah V. Suresh, Headmaster, Govt. Bungtlang H/S te hnenah he chawimawina hi hlan a ni a. Serchhip DEO Lawmawma chuan chawimawina hi hlanin DEO leh SDEO Office Staff te bakah DPC Office a thawktute, District Selection Committee Member leh sawmbik mi thenkhat te an tel a. Kumin-ah hian Serchhip District chhung atangin Lalengliana Chawnghlut, Govt. P/S-II, E. Lungdar chuan State Award to Teacher chawimawina a lo dawng tawh bawk a ni.

Primary School Zirtirtu zinga chawimawina dawngtu R. Lalmalsawma, Headmaster, Govt. Hmuntha P/S hian Saptawng thiam duhna avangin Mizoram hmun tinah English Medium School an bawh nasa tih hriain Hmuntha khua Primary School chu English Medium School-ah leh a dil ve a, sawrkar pawhin pawmpuiin kum 2023 atangin Hmuntha Primary School chu English Medium-ah letin KG-I leh KG-II hawn belh a ni a, zirtirtu mi 4 in pawl 6 an enkawl mek a, zirlai naupang pawh an pun belh chho ve leh mek a ni.

Middle School Zirtirtu atanga chawimawina dawngtu Sangchhawni, Headmistress, Govt. Central M/S, Chhingchhip hian, “Kan hnathawh leh kan naupangte hi kan hmangaih tur a ni a; kan hnathawh hi kan zah bawk tur a ni,” tih thupui-ah neiin, Zirlai naupang chhawmdawl ngaite chhawmdawlin, chhawrtlak an nih ngei theih nan theihtawpin a tanpui thin a, School kai lo te zawngchhuakin, an mamawh Uniform, Lehkhabu, Pen leh Pencil neilote hnenah a pe fo thin a. A zirtir chhuahah hian Doctor, Engineer, Nurse, Zirtirtu, Missionary leh Kohhran leh khawtlang-a mi tangkai tak tak an awm nual a ni.

High School Zirtirtu atanga chawimawina dawngtu V Suresh, Headmaster, Govt. Bungtlang H/S hian zirlai naupangte a hmangaihin a theihna zawng zawng hlanin Science leh Mathematics Subject a zirtir thin a. Zirlaite harsatna a hriatthiam puiin an hriatthiam theih ngei tura zirtir a tum tlat thin a, naupangte pawhin an ngaina em em a ni. Kumtin in HSLC Exam dawnah Study Camp a neih pui ziah thin bawk a ni.