Tui-a chetsualna laka himna tur sawiho a ni

Tuitla avanga nunna chan an lo tlem zawk nan leh mipui an lo him zawk nan nimin khan ‘State Level Seminar in Accidental River Drowning Incidents’ chu Taxation Department Auditorium, Aizawl-ah neih a ni.

He Seminar hi DM&R changtu Home Minister Lalchamliana chuan hmanpuiin Mizoram-ah tui tla kan awm fo thin chu pawi a tih thu a sawi a, Mizo dan-a ni sarih chhung bo zawnga mahni nun thapa che chhuak thinte erawh an chhuanawmin, hnam tihmingthatu an nih thu a sawi a. Vanduai hrim hrim avanga tui tla an awm rualin thenkhat chu fimkhur tawk loh vang a nih thin thu a sawi a. Rui chunga tuichen te, basa ngam ringawt te leh a bik takin Fur laia lui tui hlauhawm theih zia hriat loh vang te a nih thin avangin fimkhur thar a tul thu a sawi bawk.

Nitin chhuak chanchinbu thenkhat report lakkhawm atanga a lan danin kum 2011-2021 chhung khan Mizoram-ah tui tla avanga nunna chan mi 300 chuang awm anga chhinchhiah a ni a, an zingah kum 21 atanga kum 40 inkar an tam ber a ni. World Health Organization (WHO) chuan kumtin tuitla avangin khawvel pumah mi 360,000 thi thin niin an chhinchhiah a, chung zinga a zatve chu kum 30 hnuailam an ni. India ram bikah chuan National Crime Records Bureau in a chhinchhiah danah nikum 2021 khan rampum a tui tlak avanga nunna chan chu mi 36,362 an ni thung. Disaster Management Division, Ministry of Home Affairs chuan tuitla chu Disaster-ah a rinluh hleih theih loh avangin chhiatna dang thenkhata ex-gratia pek thin chu tuitla ah chuan sawrkar atang chuan a pek theih rih loh thung a ni.