Ramchhunga BRO te hnathawh zawhfel hawn thar 90 zingah Mizoram-a Project 5 a tel

Defence Minister Rajnath Singh chuan nimin khan Border Roads Organisation (BRO) ten ramchhunga Project hrang hrang an thawh zawh tawh 90 te chu Internet kaltlangin a hawng a, heng Project hawn zingah hian Mizoram chhunga hmalakna panga (5) a tel a ni.

Defence Minister Rajnath Singh hian nimin khan ramchhunga BRO te hmalakna hnuaia thawh Project 90 te hi New New Delhi atangin biakhmuh theihna kaltlangin a hawng a, heng hmalakna hawn tak te hi inkalpawhna kawngpui 22, Lei dawh 63, Leiverh pakhat, Airfield 2 leh Helipad 2 te niin Mizoram chhunga hnathawh a hawnte hi Project Pushpak hmalaknaa thawh inkalpawhna kawngpui pathum leh lei dawh pahnih te a ni a. Union Defence Minister-in a hawn rual hian Thuampui-a Pushpak hmuna hun hmanah, BRO Chief Engineer SP. Kolipey chuan Mizoram a Project panga hawnte a tarlang a, hengte hi KM 30-a thui Kawlchaw-Phura leh Tawngkawlawng inkalpawhna kawngpui cheng nuai 13560.23 hmanga siam te, cheng nuai 13491.48 senga Tuipang-Laki leh Lungpuk inkalpawhna kawngpui KM 20 leh cheng nuai 6685.83 senna Zawngling-Mawhre leh Sapi inkalpawhna kawngpui KM 20-a thui bakah Lei pahnih, cheng nuai 655.95 senga Lawngtlai District a Sakei Lui Lei dawh, meter 50-a thui leh Mamit District-a Dampuilui a Lei dawh, meter 30 a thui, cheng nuai 315.56 senna te a ni a, heng Project 5 thawh nan hian a vaiin cheng vbc. 438 sen a nih thu tarlan a ni.

Teirei Forest leh Damparengpui inkar Dampa lui-a RCC Lei dawh hi Mamit Bialtu MLA leh Road & Infrastructure Development Board Vice Chairman H. Lalzirliana chuan Ribbon chep chatin lirthei kaltlang theih turin nimin khan a hmunah a hawng a, bialtu MLA chuan helai kawng, Tui-puibari Road hi kum 20 dawn thawmthat loha a awm hnuah kawngpui tha a awm ta zel chu Mamit District hmasawnna leh mellung ropui tak a nih thu a sawi a. Ram hmasawnna atana pawimawh berte zing a mi, inkalpawhna kawng siamthat an ni zel chu a ropui a tih thu sawi bawkin, hnathawktute leh khawtlang mipui thawhhona chu lawmawm a tih thu a sawi bawk.