Mizoram KVI Board Office building thar hawn a ni

Mizoram Khadi & Village Industries Board (Mizoram KVI Board) Office Building MINECO, Aizawl-a sak thar chu nimin khan Commerce & Industries Minister Dr. R. Lalthangliana chuan a hawng.

Mizoram KVI Board Chairman Lalthanliana kaihhruaia Building thar hawnna ah hian Minister Dr. R. Lalthangliana chuan kum hnih chhung Covid-19 hripui leng leh harsatna hrang hrang hmachhawn hnuah pawh a taka hmasawnna thil hmuh tur awm thinchu sawrkar leh mipuite tan a lawmawm takzet tih sawiin, hun reilote chhunga KVI Board Office tha tak sak zawh a ni thei chu a hnathawkte inpekzia leh thahnemngaihzia a tilang tilangtu a nih thu a sawi a, mipuite tan tangkai taka hmang ngei a nih zel tura a chah bakah, Mizo kutchhuak thil chi hrang hrangte pawh a zahpuiawm ta lo hlea a hriat thu a sawi a, sawrkar hna chauh ni lovin mahni themthiamna leh talent hmangin tunlai khawvelah eizawnna tling thil tam tak a awm tawh thu a sawi bawk.

Mizoram Khadi & Village Industries Board hi Mizoram Legislative Assembly in Statutory Board ni turin kum 1986 khan a din a, Office atan mimal In luah hawh thinin Mizoram sawrkarin MINECO-ah Office hmun tur a pek hnuah Office tur hi Semi-Pucca leh Assam Type Building-in sak a ni a. Kum 2007-ah MINECO ah insawn niin, MINECO-a sawrkar Office awm hmasa ber pawl a ni. He building hi a chhiat tak deuh hnuah kum 2021 December thla tawpah Special Assistance to States for Capital Investment (SASCI) Scheme atangin ‘Construction of Skill Training Centre Building for Mizoram KVI Board’ atan cheng nuai 500 pek a ni a. Kum 2022 July thla khan building sak hna hi tanin thla 13 chhungin sak zawh a ni.

Mizoram KVI Board hnuaiah hian thawktu mi 134 awm mekin Group A Officer 11; Group B 52; Group C 32 leh Group D 24 bakah Contract Employee 5 leh Provisional Employee 10 an awm a. Mimal leh Society te Loan leh tanpuina awm thei ang pek a eizawnna siam sak hna te; Training Centre dinin, a tui mite Training pek leh eizawnna tlak thiam thil nei tura puih hna te; Industry neitute thil siamchhuah hralhna ngaituah sak leh thehlar sak hna leh Mipuite mahni ke a ding thei tura zirtir leh KVI thilsiamte ngaihlu tur a mite zirtir hna te an thawk a ni.

Mizoram KVI Board hian Zemabawk-ah Multi Disciplinary Training Centre (MDTC) a nei a, Industry Trade hrang hrang 11-ah kum tluanin Training pek thin a ni a. Khadi leh Village Industry atanga thilsiam chhuahte hralhna tur Sales Emporium Aizawl leh District 5-ah hawn a ni a. District 6-ah District Office hawn ni tawhin, PMEGP Loan dilna bakah Industry din tura harsatna neite tan pan theih reng an ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man