Sub-Junior National Football-ah Mizoram Champion

Mizoram chuan si thum fai-a Manipur hnehin Sub-Junior Boys' National Football Championship 2023-2024 ah an Champion ta.

Sub Junior Boys’ National Football Championship Tier-1 2023-24 hi tun thla ni 3 atang khan khelh niin West Bengal-a Malda and Berhampore-ah te khelh a ni a, India ram State hrang hranga naupangte Football-a inelna, Sub-Junior Boys' National Football Championship 2023-2024 ah hian Mizoram aiawhin Kolasib-a Saidan Academy-a naupang te kalin nimin khan West Bengal-a Behrampore Stadium-ah Final khelh a ni a, Mizoram leh Manipur te inhmachhawnin Mizoram tan minute 4-na ah Lalruatdika chuan goal khungin Henry Lalhnehzova chuan minute 52-na ah an goal hnihna a khung leh a, minute 76-na ah Isak Lalmalsawma chuan an goal thumna khung lehin harsa lo takin hnehna an chang a ni.

He inelna ah hian ramchhunga State hrang hrang atangin Team 16 an tel a, heng te hi Group 4-ah then niin Mizoram hi Group C-ah Kerala, Maharashtra leh Odisha te nen an awm a, Mizoram hian Maharashtra chu 9-0 a sawpin Kerala hi 1-0 a an hneh bakah Odisha 5-1 a hneh lehin Semi Final an lut a ni.

Semi Final-ah Uttar Pradesh hmachhawnin niminpiah khan District Sports Association Stadium-ah Semi Final hi khelin hun pangngai ah goal inpe lovin an inhnehtawk a, Extra-Time minute 94-na ah Isak Lalmalsawma chuan Mizoram chakna goal khungin Final an inhlangkai a, nimin khan Final hi khel lehin si thum faia hnehna changin an Champion ta a ni.