Serchhip-a sawrkar rate aia sang-a Parking Fee khawn chungchang Serchhip DTO sawipui

Serchhip District Consumer Association (SDCA) chuan Parking Fee khawntu ten mipui te hnenah Receipt pe tawh se an duh thu sawiin, Parking Fee rate pangngai aia sang a khawn an awm anih chuan thuneitute hnenah report thin turin mipuite an ngen bawk.
Nimin-a thuchhuah an siamah Serchhip District Consumers Association (SDCA) chuan tunhnaia Serchhip Bazar leh a chhehvela Parking Fee khawntuten lirthei thenkhat ah sawrkar in a rate tur a bithliah aia tamin an khawn thin tih report an dawn thu leh hemi chungchang hi nimin khan Serchhip District Transport Officer (DTO) an sawipui thu sawiin, sawrkar dan siam chu Parking Fee khawntuten an zawm theih nan hmala tura an ngen thu an sawi a. Parking Fee khawntute chu mipuite hnenah Receipt pe thin tawh tura ngenin, hemi chungchangah hian hma laksak turin DTO hi an ngen a. Parking Fee rate aia sang a khawn an awm anih chuan thuneitute hnenah report thin tura mipuite ngenin, Parking Fee an pekna receipt hi mipui ten an chanvo anih avangin fee khawntute hnenah hian dil thin turin an ngen bawk.

SDCA in Serchhip Bazar leh a chhehvel-a Parking Fee rate hmanlai an tarlan danin lirthei ke hnih nei-ah darkar khat ah Rs. 5/- niin darkar hnih-ah Rs. 10/- a ni a, darkar khat zelah hian Rs. 5/- zelin a pung chho a. LMV/MMV leh HMV-ah darkar khat ah Rs. 10/- niin darkar hnih ah Rs. 20/- a nih bakah darkar khat zelah Rs. 10/- in a pung chho ve bawk a. Tunhnaiah Two Wheeler Paking Fee hi Rs. 10/- a khawn an awm thin niin thudawnna pakhat chuan a sawi a ni.

Serchhip District Consumers Association (SDCA) hruaitute hian nimin khan Serchhip-a MIZOFED Office-ah Branch Manager chu hmuin tunhnaia MIZOFED ten Gas Consumer te Mobile link na tura MIZOFED Office-a mipui te kal tura an tih chungchangah thil awmzia an sawipui thu an sawi bawk a. Hetianga MIZOFED Office pankhawm hi Veng kilkhawr tak tak leh mi harsa zawkte tan chuan thil harsa leh sum leh pai engemawzah insenso ngai anih avangin tunlai thiamna lo sang chho zelah MIZOFED Office a kal kher lova tihdan zawng turin an ngen tih an sawi a, Veng tina YMA te emaw, Consumer hruaitute emaw hmang tangkaia mipui te harsatna siam lo thei ang ber a Mobile link chu kalpui tura an ngen thu an sawi bawk a ni.

Comments

Popular News (Last 30 Days)

LPG man bithliah thar