Serchhip District-a Two Wheeler Taxi service turin khaw pahnih tan Permit 174 pekchhuah a ni tawh
RTI Dan hmanga zawhna Transport Department-a State Public Information Officer (SPIO) leh Transport Department-a Joint Director (MV) in a chhanna atanga a lan danin Serchhip District chhung, Serchhip Town leh Thenzawl Town-ah te Two Wheeler Taxi Service tir tum a ni a, Serchhip-a Two Wheeler Taxi Service tir tur chungchangah mipui ten Two Wheeler Taxi an mamawh dan zirchianna neih hmasak a ni em tih zawhna chu zirchianna neih hmasak a nih thu leh Serchhip DC kaihhruaina hnuaiah DTO, NGO leh Commercial Vehicle Owners Association te chuan Permit pek dan tur an lo rel ho hmasak thu leh November 15, 2021-a STA Meeting chuan a thlir nawn leh thu a tarlang a. Hemi hnu hian Permit pekchhuah tura process a nih thu a tarlang bawk.
Transport Department SPIO chuan kumin (2023) July 5-a STA Meeting chuan Serchhip Town leh Thenzawl Town atan Two Wheeler Taxi Permit a pekchhuah thu pawh tarlangin, Permit hi a tlachawpa pek ni lovin STA Meeting thutlukna anga pekchhuah a nih thu leh Permit pek te hming pawh RTI chhanna ah hian tarlan a ni a. Heta a lan danin Serchhip Town tan hian Two Wheeler Taxi Permit 135 pekchhuah niin Serchhip mi 65, Chhiahtlang 12, Lungkawlh leh Khawlailung mi 6 ve ve, Lungchhuan leh East Lungdar mi 5 ve ve, North Vanlaiphai mi 4, Bungtlang leh Khumtung mi 3 ve ve leh Leng, Rullam, Zote South leh Chhingchhip mi 2 theuh bakah Keitum, Darlawng, Ngentiang, Kanghmun South, Mual-cheng, Baktawng Chan In, Sialhau, Hualtu, Lungpho, Thentlang, Buhkangkawn, Mualthuam North, Thenzawl, Hmuntha leh Chhingchhip Mualpui-ah mi pakhat theuh pek an ni a. Aizawl lam mi 3 pek an ni bawk. Thenzawl-a Service turin Permit 39 pek an ni tawh bawk a ni.
Two Wheeler Taxi permit pek te hi Permit pekchhuah an nih atanga thla ruk (6) chhunga lirthei register vek tura tih an ni a, 125 CC aia hniam lo Two Wheeler, Brand New, eng Company siam pawh Two Wheeler Taxi atan hian hman theih a ni bawk.
Comments
Post a Comment