District Hospital-a Doctor Post ruak hnawhkhat turin tun dinhmun ah chuan a harsa rih - Health Minister

Health Minister Dr. R. Lalthangliana chuan District Hospital-a Doctor Post ruak hnawhkhat turin tun dinhmun ah chuan a harsa rih hle tih a sawi.

Saitual-a Chief Medical Officer (CMO) Office Building hawnna nimin-a neih ah Health Minister Dr. R. Lalthangliana chuan Doctor indaihlohna chungchang sawiin, tunah hian Doctor sawrkar in a chhawrlai mi 30 chuang PG an zir mek thu leh service lai te an lo pension anih loh pawhin nunna chan te an lo awm thin tih a sawi a, ZMC-a Final Year zo tawh ten Internship an ti mek bawk si nen, District Hospital a Doctor post ruak hnawhkhat turin tun dinhmun ah chuan a harsa rih hle a ni, a ti. Health Department chu Department hnathawh dan danglam deuh bik a nih avangin sawrkar pawh in a ngai pawimawh takzet tih pawh Minister chuan sawiin, Doctor pension hun pawh kum hnih a pawhsei a ni a, tunhnai ah Nursing Directorate pawh establish tura notification tih chhuah a ni tawh tih a sawi a, hetih rual hian Nurse te ramdanga an thawh theihna tur pawh theih ang anga dap sak an nih thu leh in dawrna a kal mek thu a sawi bawk.

Health Minister chuan Covid hrileng in hun rei tak Mizoram a tuam avangin sum thahnem tak a luangral tih sawiin, chuti chung chuan Covid zawh hnu reilote ah District thar pathum (3) a CMO Office hawn theih a peihfel a ni chu a lawmawm hle tih a sawi a. He huna kalkhawm Doctor leh Nurse te chu an hna tlawmngai leh taima taka thawk tura ngenin, Damlo te chu an tawngkam chhuak avanga rilru lam thleng a damna nei thei an ni tih hria a, hmangaih leh duat taka enkawl turin a ngen bawk.

Saitual CMO Building hi cheng nuai 441 senga Lushai Engineers ten an sak a ni a; Mizopa chhiara chhawng li-a sang a sak niin Senior CMO, Sr Medical Officer, Drugs Inspector, National Health Mission, District Early Intervention Centre, Accounts Section, Conference Hall, Meeting Room, Mobile Medical Unit, Establishment Section, District Blindness Control Programme, District TB Centre, Food and Drugs, NPCDCS, District Vector Borne Diseases Control Program, Expanded Program in Immunization te tan Room pakhat theuh bakah Ground Floor-ah Temporary Storage Area pahnih leh a chhehvelah Open Car Parking a awm bawk a ni.

Comments

Popular News (Last 30 Days)

LPG man bithliah thar