Serchhip District-a KVK te hmalakna hmun MJA Serchhip District member ten a hmunah an tlawh

MJA Serchhip District Member te chuan nimin khan North Vanlaiphai-a Serchhip District KVK chu tlawhin an hnathawh dan te an en a, KVK a thawktu ten an hnathawh dan hrang hrang te lo hrilhfiahin an hmalakna hmunhma hrang hrangte pawh an tlawh nghal bawk a ni.


North Vanlaiphai-a Krishi Vigyan Kendra (KVK) tlawhtu MJA Serchhip District Member te hi KVK North Vanlaiphai-a Senior Scientist & Head Dr. T. Vanlalngurzauva leh a thawhpui ten lo dawngsawngin MJA Member ten an hnathawh leh an kalphung te hre duha an tlawh chu lawmawm an tih thu a sawi a. KVK chu kut hnathawktute inzirna hmun, Central Sector Scheme hnuaia awm leh ICAR Funding hnuaia kalpui, State sawrkar-ah Agriculture Department enkawlna hnuaia awm a nih thu a sawi a. Serchhip District KVK hi kum 2008 khan North Vanlaiphai-ah hian hawn a nih thu leh tunah hian Senior Scientist & Head kaihhruana hnuaiah Scientist (Subject Matter Specialist) mi 6 bakah thawktu dang 9 an awm mek thu a sawi a. KVK chu ICAR hnuaia awm a nih thu te, India ram hi ICAR chuan Zone 11-ah thenin Mizoram chu Zone 7-na hnuaia awm anih thu sawiin, North Vanlaiphai KVK hian an Zone huamchin ah hian an hnathawh avanga lawmman hrang hrang te pawh an lo dawn tawh thin thu a sawi bawk.

KVK North Vanlaiphai Conference Hall-a KVK-a thawktute leh MJA Member te inkawmna hunah hian KVK North Vanlaiphai-a SMS (Agronomy) Kenny Zohmingliana chuan KVK in hma an lakna hrang hrang te sawifiahin, KVK North Vanlaiphai-a thawktute chuan Serchhip District tan theihtawp chhuaha hma an lak thu leh amaherawh chu an duh anga an la inzarpharh theih loh thu a sawi a. Chutihrual chuan an hnathawh rah hrang hrangte chu Serchhip District mai piah lamah District hrang hrangah te pawh an lakchhawn nasat thu a sawi a. KVK chuan loneitu ten tam zawk leh hlawk zawk, kan sik leh sa danglam zel mil-a thlai chin a nih theihna tur atan te zirchianna an neih thin thu sawiin, chung te chu Agriculture Department-ah thlenin kuthnathawktu ten an lo hmangin an lo ching zui ta thin tih a sawi a ni.


Tun dinhmuna KVK North Vanlaiphai te hmalakna lian ber pakhat chu Buhtun (Millets) chin chungchang ah a nih thu pawh sawiin, kum 2018-2019 vel atang khan hma an lo lak tawh thu leh United Nations in kumin hi 'International Year of Millets' ah a puan hnuaiah nasa zawka hma an lak thu a sawi a. Buhtun chu tunhma lamah pawh kan lo chin nasat a nih laiin hun engemaw chen kan chin mumal tawh loh thu leh mihring mamawh chakna chi hrang hrang pai tam, a tharchhuah pawh hun rei tak dahthat theih a nih thu a sawi bawk.

He hunah hian MJA Serchhip District President C. Lalhminghlua chuan MJA chu sawrkar leh mipui inkara palai hna thawktu an ni tih sawiin, KVK North Vanlaiphai te hmalakna hrang hrang an hmuh ah tih tak taka hma an lakna chu lawmawm a tih thu leh ropui a tih thu a sawi a, hetianga KVK North Vanlaiphai ten an hnathawh dan mipuite hnena puanchhuah tur an nei chu ropui an tih thu a sawi a. KVK te chu kuthnathawktu te tana nasa taka thawktu an nih thu leh an hnathawh te mipuite hlanchhawnna turah MJA ten tangkaina an nei a nih chuan theih-tawp chhuah an inhuam thu a sawi bawk.

KVK-a thawktute leh MJA member ten inkawmna an nei zawh hnu hian KVK Complex-a an hmalakna chi hrang hrang tlawhin Buhtun tharchhuah dan te, Vahmim enkawlna hmun leh Green House hmanga thlai chi hrang hrang an enkawlna te an tlawh a. Hemi hnu hian North Vanlaiphai Leilet hmun-a Buhtun chinna hmun leh thlai dang an chinna hmun te tlawhin KVK-a thawktu ten an hnathawh dan hrang hrangte an hrilhfiah bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man