Serchhip-ah Family Oriented SEDP hnuaia tanpuina dawngtute hmalak dan tur hrilhfiah an ni

Serchhip District chhunga Family Oriented SEDP Second Phase hnuaia tanpuina dawng turte chu nimin khan Serchhip Auditorium-ah kohkhawm niin SEDP hnuaia an sum dawn hmanga hna an thawh dan tur leh hma an lak dan turte hrilhfiah an ni.

Serchhip Auditorium-a Family Oriented SEDP hnuaia tanpuina dawng turte intawhkhawmna hun hi Serchhip District Bawrhsap leh District Level SEDP Committee Chairman David Lalthantluanga chuan hmanpuiin Mizoram pumah Family Oriented SEDP Phase 2 hnuaiah hian tanpuina dawng tur mi 60,000 vel an awm thu leh Line Department 9 awmin Serchhip District-ah chuan tanpuina dawng tur hi mi 4504 thlanchhuah an ni tawh tih a sawi a. Family Oriented a nih angin chhungkaw pakhat ah mi pakhat zelin tanpuina hi dawn theih a nih thu sawiin, SEDP in a tum ber chu mahni mimal-a eizawnna nei mek te puih leh chutiang atana bultan tum leh kuthnathawk mek ten tanpuina an lo hmuha hma an lo lak ve zelna tura puih te a nih thu a sawi a. SEDP chu programme pawimawh tak, sawrkar in sum tam tak a senna tur a nih thu sawiin, tanpuina dawng turte pawhin rilru puitling tak pu-a dinchhuahna atana hman tum turin a chah a. Tanpuina dawng turte hi an Bank Account-ah sum thun sak an nih dawn thu sawiin, Serchhip District chu District lian lo leh mipui cheng pawh tam lutuk lo, inkalpawhna kawngpui tha takin a thlunzawm leh thil tihna leh a hlawhtlinna atana hmun remchang, Zoram mipuite thlir kan nih anga SEDP hmalakna pawh hlawhtlin pui ngei tum turin kalkhawmte chu a chah a ni.


Serchhip District-a SEDP tanpuina dawng turte intawhkhawmna hunah hian Tourism tih loh SEDP Line Department pariat (8) aiawh ten an Department hnuaia SEDP tanpuina sem tura an hmalakna leh an dinhmun te an tarlang a. Beneficiary ngah ber AH&Vety Department chuan an Department hnuaiah tanpuina dawng tur mi 2818 an awm thu leh tanpuina semchhuak tura an inpeih tawh thu sawiin, Vawiin hian Bank-ah sum dahlutin semchhuah a ni dawn tih an sawi a. Horticulture Department chuan an Department in beneficiary 491 an neih thu leh karleh lamah tanpuina sem hman an tum thu an sawi a, tih tur tul ang ang te an buaipui fel tawh thu an sawi bawk a ni.

Sericulture Department chuan beneficiary pathum an neih thu sawiin, Directorate atangin sum an dawn tawh thu leh semchhuak leh tura an inpeih tawh thu an sawi a. Fisheries Department chuan Serchhip District pumah beneficiary 84 an neih thu sawiin, tunah hian tanpuina sem tur hi Bank-ah dahluh tawh a nih thu leh Bank lamin an tifel a nih chuan a dawngtu turte Account-a lut nghal thei tawh tur a nih thu an sawi bawk.


Agriculture Department chuan beneficiary 222 an neih thu sawiin, Bank-ah Cheque an dahluh tawh thu leh tanpuina dawngtu turte Account-a lut thei dinhmunah an din reng tawh thu an sawi a ni.

Commerce & Industries Department chuan Serchhip District pumah an Department hnuaia SEDP tanpuina dawng tur mi 833an awm thu sawiin, nimin khan Directorate atangin tanpuina sum hi hi an dawn thu an sawi a, harsatna dang a awm loh chuan tunkar chhung hian Bank Account-a thun hman an beisei thu an sawi a. Land Resources, Soil & Water Conservation Department chuan Beneficiary 24 an neih thu leh Vawiin hian tanpuina sum hi a dawngtu turte hnenah pekchhuah a nih dawn thu an sawi a. UD&PA Department chuan Serchhip District pumah beneficiary 26 an neih thu leh tunah hian Aizawl lam atanga sum hi dawng tawhin semchhuak thei tura an inpeihfel tawh thu an sawi bawk.

Nimin-a he hun hmanna ah hian SEDP tanpuina dawngtu ten hma an lak dan turte inhrilhfiah a nih bakah zawhna leh chhanna hun te hman nghal a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man