SEDP leh PAHOSS a hlawhchham - CLP Leader

Congress Legislature Party (CLP) Leader Zodintluanga chuan MNF sawrkar Flagship Programme SEDP leh Chief Minister-in a duanchhuah Parking House Support Scheme (PAHOSS) chu a hlawhchham chiang hle niin a sawi.

Inrinni-a thuchhuah a siamah CLP Leader chuan inthlan dawna cheng nuai 3 sem an tumna Project SEDP chu chiang takin a hlawhchham tih sawiin, “Tuna Chief Minister ni ta hian inthlan dawnah cheng nuai 3 aia tlem lo an sem tur thu uar takin a tlangaupui a, mipuite pawh lo awih sakin sawrkarna an chan phahna chhan pawimawh tak pakhat a ni,” a ti a. Sawrkarna an chan hnuah inthlan dawna an tlangaupui lo ang hlirin SEDP an kalpui tih sawiin, “Mipui chan ve chin a tlem hle. Inthlan leh dawn tepah mi 60,000 hnenah cheng nuai 3 ni loin, a let engemaw zata tlem Rs. 50,000 an sem ve tawk a ni,” a ti.

CLP Leader chuan SEDP chhungkaw 60,000 dang hnenah pek leh sawrkarin a tum tih sawiin, hei pawh hi cheng nuai 3 ni lovin Rs. 50,000 tho a nih thu a sawi a. Inthlan puan a hlat tawh loh avangin hei pawh hi an sem thei a ngem hriat a nih loh thu a sawi bawk.

PAHOSS chungchang pawh sawiin Zodintluanga chuan, “Mi tam takin PAHOSS dawng tura thlan an nih avangin an In leh lo te an tidanglam a, an dawnzui mumal leh theih si loh avangin an buai phah hle,” a ti a. PAHOSS dawng tura thlan zingah mi 11 chiah an sum dawn tur ang dawng kim an la awm niin a sawi. UD&PA chuan PAHOSS dilna 1,456 dawng tawhin tanpuina dawng turin mi 403 thlan a ni tawh a, mi 140 hnenah First Instalment cheng nuai 890 pek a ni a, mi 47 hnenah Second instalment cheng nuai 200.60 pek tawh niin, mi 11 hnenah Final instalment cheng nuai 34.20 pek ni tawhin tanpuina dawng tura thlan zingah sum la dawng lo mi 205 an awm a ni.