Lokayukta in eiruk thubuai chhui tur 52 dawng tawh

March ni 11, 2019-a Mizoram Larsap-in Chairman a lakluh hnua a taka hna thawk tan, Mizoram Lokayukta chuan eiruk thubuai chhui tur 52 a dawng tawh a, kumin ah thubuai chhui tur 5 an dawng tawh bawk.

Lokayukta tarlan danin, tun thlenga thubuai chhui tur a dawn tawh 52 zing a 20 chu titawpin, Regular Investigation 19 neih mek a ni a. Thubuai 37 ah chhuichianna hmasa/Preliminary Enquiry (PE) neih tawh a ni a, PE report 28 dawng tawhin, PE la tihfel loh (pending) 9 a awm a, thubuai panga chu PE neih hmaa chin fel a ni. 

Kumin 2023 chhungin Mizoram Lokayukta ah thubuai 5 dawng tawhin, chungte chu Local Administration Department, Chakma Autonomous District Council (CADC) chungchang te, Green India Mission Fund hman dik lohna awm ni a tarlan chungchangte, Aizawl South I chhunga SASCE Scheme Cund hman dik lohna awm ni a ngaih chungchangte, Sawrkar sum cheng nuai 100 ziahbo chungchang leh Reiek Tourist Resort siamna a Fund hman dik lohna ni a tarlan chungchangte a ni. Hetihlai hian Mizoram Lokayukta hian thubuai chhuitu tur, Investigation Wing hran a la nei lo a, Prosecution Wing ah erawh thawktu an nei tawh thung.