Sakhaw tê zawk leh hnam tenau zawk BJP sawrkar hnuaiah Dân hmanga rahbeh leh thliar bik kan ni mek - MPCC

Congress Party chuan Sakhaw tê zawk leh hnam tenau zawk te chu BJP sawrkar hnuaiah Dân hmanga rahbeh leh thliar bik kan ni mek nia sawiin, BJP leh a thawhpuite paihthlaa Sakhaw zalenna duhtu Congress Party chu thlawp turin Mizoram mipuite an ngen tih an sawi bawk.

Nimin-a Aizawl Press Club-a thuthar thehdarhtute an kawmna ah MPCC thupuangtu Dr. Lallianchhunga chuan BJP sawrkar hnuaiah hian India ram Hindu lalram-a din tumna chak takin a kal mek tih a sawi a, Sakhuana behchhana India khua leh tui nih theihna dan, Citizenship Amendment Act (CAA) pawh thiam taka an kalpui avangin MNF sawrkar pawhin tha takin a lo thlawp tawh nia sawiin, India ram tan Dân pakhat (One Nation, One Law) chauh hman a nih theihna turin Uniform Civil Code (UCC) pawh uluk takin an buaipui mek a nih thu leh June 27, 2023 khan Prime Minister Narendra Modi chuan Bhopal-a BJP party mi leh sa te intawhkhawmnaah UCC (Uniform Civil Code) hman vat a duh thu a sawi chhuak hial tawh tih a sawi a. “Ram leilung fate rahbeh tumin Forest (Conservation) Amendment Act, 2023 kalpui tumin hma a la leh mek bawk. Tunah 'One Nation, One Election' kalpui tumin hma an la a. 'One Nation, One Language' pawh an manifesto-a an telh a ni,” a ti.

BJP te chuan engkim mai thlak danglam vek tumin, Indian Penal Code (IPC), Criminal Procedure Code (CrPC) leh Indian Evidence Act tih te pawh Bharatiya Nyaya Sanhita, Bharatiya Nagarik Suraksha Sanhita leh Bharatiya Sakshya Bill tia thlak tumin Parliament-ah putluh a ni tawh tih MPCC thupuangtu chuan sawiin, sawiselna nasa tak vangin Standing Committee of Parliament enfiah tura dah mek a nih thu a sawi a. September 18, 2023-a Special Session of Parliament neih turah sawrkar chuan 'India' tih chu 'Bharat' tih chauh hman turin a thlak dawn nge tih pawh sawi chian theih a ni lo tih a sawi a. Heng te hi Dân (Law) hmanga Hindu lalram din tumna a nih thu sawiin, “Sakhaw tê zawk leh hnam tenau zawk te chu BJP sawrkar hnuaiah hian Dân hmanga rahbeh leh thliar bik kan ni mek a ni,” a ti bawk.

MPCC thupuangtu chuan kan hnam lung-phum pawimawh tak hi BJP sawrkar hmalakna hrang hrang hian a sàwinghing mek nia sawiin, BJP leh a thawhpuite paihthlaa Sakhaw zalenna duhtu Congress Party chu thlawp turin Mizoram mipuite an ngen tih an sawi bawk a ni.