Serchhip-ah Heroin Hawng 79 zet man a ni

Serchhip-a Excise & Narcotics Department chuan nimin khan Heroin nia hriat Hawng 79 zet an man a, Serchhip-a Excise & Narcotics Department ten tum khata Heroin an man tam ber tum nia hriat a ni.
Serchhip-a Excise & Narcotics Department hian an thudawn bawhzuiin nizan hmasa khan Champhai lam atanga Motor rawn chhuk thla te chu Tuichang lui-ah an lo enfiah a, damdawi rawn phurtu nia rinhlelh Motor -Bolero (A/S-11V-5670) leh Alto K10 (A/S-10B-1115) hi an enfiah hnuah engmah man nei lovin chiang zawka enfiah turin Serchhip-ah rawn phurh a ni a, hetah hian hriatpuitu turte ko in uluk zawkin motor hi enfiah leh a ni a, nimin chawhma dar 10:00 vel khan Alto K10 hmalam a thuhruk heng damdawi te hi manin Motor number hi a lemin an lo thlak a ni.

Heng damdawi an man te hi Sahbawn bawm-a dah niin a vaiin Hawng 79 zet a ni a, hemi kaihhnawih ah hian damdawi phurhna Motor khalhtu Sirajul Hoque (25), Bakirchal, Karimganj, Assam nia inchhal bakah MD, Musleh Uddin (23), Brahmansasan, Karimganj, Assam; Abdul Khayer Mohammed (37), Nilambazar Karimganj; Assam; Abdul Karim (35), Sagaibari, Tripura leh Sahin Ahmed (27), Nilambazar Karimganj, Assam nia insawi te chu man nghal an ni a, nimin khan a theih anga chhui zui nghal niin Vawiin hian Serchhip District Court-ah hruai tura ruahman a ni.

Tun tuma damdawi man hi Serchhip-a Excise & Narcotics Department ten tum khata damdawi an man tam ber tum a ni a, tun dinhmunah Hawng khat hi Serchhip-ah Rs. 25,000/- man vel nia chhut niin hemi ang hian tun tuma damdawi an man hi Rs. 19,75,000/- man vel a ni.