Bank te hmalakna thlirho

Serchhip District chhunga Bank hrang hrang ten kumin June thla tawp Quarter thlenga hma an lak dan te thlirin nimin khan Serchhip-ah Special District Consultative Committee/District Level Review Committee/District Level Security Committee (DCC/DLRC/DLSC) thutkhawm neih a ni.
Serchhip DC Meeting Hall-ah DLRC/DCC/DLSC thutkhawm hi an Chairman leh District Bawrhsap David Lalthantluanga chuan kaihruaiin Serchhip District chhunga Bank hrang hrang ten kumin June thla tawp Quarter thlenga hma an lakna hrang hrangte thlirho a ni a. Bank hrang hrang ten sum an dawn (Total Deposit) chu cheng nuai 47556.82 niin Loan an pekchhuah (Total Advances) chu cheng nuai 32270.87 a ni thung a, Credit Deposit (CD) Ratio chu 67.86% niin March thla tawp Quarter-a CD Ratio 60.11% aiin a sang zawk a ni.

He thutkhawm ah hian Annual Credit Plan (ACP) hnuaia hmalakna thlirho niin kum 2023-2024 chhungin Priority Sector hnuaia Agriculture Sector-ah 4.32% tih hlawhtlin ni tawhin MSME hnuaiah 15.19% leh Other Priority Sector-ah 6.28% tih hlawhtlin a ni tawh a. Non-Priority Sector hnuaiah 50.07% tih hlawhtlin ni tawhin hei hi a tha hle tih tarlan a ni a, Loan chhia erawh a hma aiin a pun thu tarlan a ni bawk. Serchhip District-ah hian Bank chi hrang 5 awmin Branch 16 a awm a ni.