PAC in State Institute of Hotel Management din kawnga thil tih dan na takin a sawisel

Mizoram Assembly hnuaia Public Accounts Committee (PAC) chuan Tourism Department-in State Institute of Hotel Management (SIHM) din kawnga an thiltih dan chu na takin a sawisel.

SIHM din kawnga PAC Report hi tunhnai khan an Chairman Vanlalhlana chuan Assembly House-ah a pharh a. Hetah hian Comptroller General of India Audit Report-a State Institute of Hotel Management din kawnga thiltih dan tarlanna an chhui zui dan a inziak a, he Institute hi sak zawh a nih hnuah kum 7 chuang hman tangkai lohvin a awm thu report chuan a tarlang. Sawrkar laipui-a Ministry of Tourism chuan kum 2007 khan SIHM dinna atan hian cheng vbc. 10 a sanction a, Bung Bangla hmunah he Institute hi din tura tih niin kum 2007 leh 2011 inkar chhung khan a In sakna atan cheng vbc. 8 chu Ministry chuan a pechhuak a. Academic leh Administrative Building, Boys Hostel Block leh Girls Hostel Block bakah a kawt tual vel siamna atan hman tura ruahman a ni. Pawisa hi PWD kutah hlanin kum 2013 khan hna an zo a, kum 2015 May thla khan PWD hian Tourism Department kutah a hlan a ni.

Ministry-in cheng vbc. 10 pek tura a ruahman zingah vbc. 2 chu zirlaite zirna hmanrua leina atana serhhran a nih avangin pekchhuah a ni ve rih lova. Hei hi Institute a taka kalpui a nih hnu chauhva pekchhuah tur a nih vang a ni. Kum 2013 khan Tourism Department chuan SIHM a thawk tur hna 22 siam turin rawtna a siam a. DP&AR chuan he rawtna aia tlem post 19 siam a phalsak a. Chu pawh chu sum harsatna chhuanlamin sawrkarin a pawm ta lo a ni.

Kum 2019 khan sawrkar chuan post 32 siam a phalsak na-in Covid-19 hri leng avangin sum harsatna chhuanlamin post hi a taka siama hna lak a awm ta lova. Tourism Department chuan Ministry kuta cheng vbc. 2 la awm chu dil chhuak turin hma an la lova, State sawrkar pawhin pek turin ruahmanna a siam hek lo a ni.

Hetiang a nih avang hian cheng vbc. 8 senga SIHM din tura ruahmanna chu awmze nei lova awmin cheng vbc. 8 chu a thlawna senral a ni ta a. PAC Chairman leh Member-te hian a hmunah an tlawh a. In sak sate chu a awngrawp tawh hle tih an hmu a. Girls Hostel block bik chu Shivalaya Construction Company Pvt. Limited-in kum 2019 atang khan thla tin Rs. 50,000 chawiin an lo luah mek a. Chei thar leh a ngai nasa hle tih an hmu a ni. Mahse, a chei thar lehna atana cheng vbc. 2.1 dilna chu sum harsatna chhuanlamin sawrkarin a pe thei ta lova. Hemi hnu hian Trade Promotion Council of India kuta hlan mai ni se tiin thutlukna siam a ni ta a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man