Mizoram Police Sports Meet vawi 21-na zawhfel a ni

Mizoram Police Sports Meet vawi 21-na chu nimin khan zawhfel niin he Sports Meet kharna hun hi Home Minister Lalchamliana chuan a hmanpui a ni.

Rajiv Gandhi Stadium, Mualpui-a Mizoram Police Sports Meet vawi 21-na kharna hunah hian Home Minister chuan Infiamna hian kan taksa hriselna mai bakah Police te inkarah inunauna, inhmelhriatna tha, inlaichinna tha, inhriat-thiamna leh thawhhona tha a awm theih nan neih zel a nih theih nan duhsakna a hlan a. Hripui leng avanga sawrkar sum dinhmun chhiat avangin recruitment tih hleihtheih a ni lo chu pawi a tih thu leh chuti chung chuan tuna Compassionate Ground-a lut mi engmaw zat Police Training Centre-ah an training mek thu a sawi bawk.

Home Minister chuan All India Level-a Infiamna hrang hrangah Mizoram Police te a langsar pawl an ni chu a lawmawm takzet tih pawh sawiin, 71st BN Mullick Memorial Football Championship Srinagar-ah pawh Mizoram Police Team te an Champion thei chu a chhuang takzet tih a sawi a. Mahni chauha an awm lai pawhin mahni invawng tha a, discipline tha tak nei reng turin kalkhawmte chu a chah bawk.

Mizoram Police Infiammite intawh-khawmna hi September ni 18, 2023 atang khan neih niin Contingent 12 a inthenin Sports Discipline hrang hrang Football, Volleyball, Basketball, Badminton, Tug of war, Tennis, Table Tennis, Boxing, Judo, Shooting, Chess, Carrom, Chinese Checker, Taekwondo leh Athletics-ah an inel a, Gold Medal 18 lain Overall Champion chu Central Range Contingent te an ni a, pahnihna chu PHQ Group niin pathumna chu Red Group te an ni. Kumin-a Mizoram Police Sports Meet-ah hian thupui atan 'Unity Through Sports' (Inpumkhatna Tura Infiamna) tih hman niin infiammi 1107 an tel a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar