Mizo hmeichhia harsatna tawkte tana thawk thin Dr. Lalrinawmi hnenah Zakapa Award hlan a ni

Hmeichhiate venhim leh an dinhmun chawikan kawnga hnathawk tha chawimawina, Zakapa Award,  2023 chu Mizoram pawn lama Mizo hmeichhia harsatna tawkte chhanchhuahna hna vawi tam tak lo thawk tawh thintu Dr. Lalrinawmi, Tlangnuam hnenah nimin khan Chief Minister Zoramthanga chuan a hlan.

Social Welfare & Tribal Affairs Department buatsaihin nimin khan Aizawl Vanapa Hall-ah hmeichhiate venhim leh an dinhmun chawikan kawnga hnathawk tha chawimawina, Zakapa Award, 2023 hlanna inkhawm hi neih niin he hunah hian Chief Minister chuan Zakapa Award buatsaih a ni chu ropui a tih thu sawiin, “Mizo hmeichhiate chhan tura engkim chan huam lal Zakapa hi Zofaten hre rengin, huaisen takin a hnung hi i zui ang u,” a ti a. Award hming chawitu Zakapa khan dan lo angin Bawrhsap a hnial thu Chief Minister chuan sawiin, “Mahse a ram leh a hnam a hmangaihna leh a hnam dan a dinpui ngamna khan hnathawh ropui tak a nei zui ta zawk a nih kha. Keini pawhin he hnam chhan tur hian theihtawp kan chhuah zel ang a, hnam thinlung nghet tak puin, hnama min dintu Pathian hrerengin kan bei zel dawn a ni. Mizoram, a hnam, a ram leh a chhunga cheng hmeichhiate leh mipuite humhimin awm zel rawh se,” a ti bawk.

Women & Child Development Department-a Director leh Organising Committee-a Member Secretary Zoramthangi chuan Zakapa Award, 2023 dawng tura thlan Dr. Lalrinawmi chanchin tlangpui sawiin, he Award dawng tur thlanna atan hian tehfung pawimawh tak tak sawm (10) an neih thu a sawi a. Chung tehfung atang chuan a dawng tura an thlan tak Dr. Lalrinawmi, Tlangnuam hi a rawn lang fiah hle  tih sawiin, Dr. Lalrinawmi Ralte hian Mizoram pawn lama Mizo hmeichhia harsatna tawkte chhanchhuahna hna vawi tam tak a lo thawk tawh thin thu a sawi bawk a ni.

Nimin-a he hun hmanna ah hian Social Welfare & Tribal Affairs Department changtu Minister leh Zakapa Award Organising Committee Chairman Er. Lalrinawma chuan Zakapa Award, 2023 a hlawhtlin theih nana thawktute zawng zawng chungah lawmthu sawiin, a thih hnu kum 130-na ah hmeichhiate humhimtu lal ropui Zakapa hriatrengna leh chawimawina kan nei chu hlu a tih thu a sawi a. “Tlai tawh hle angin lang mahse a hnathawh ropui tak avang khan a hming hi Pathian in a bo pil a phal lova, tunah ropui takin a lo vul leh ta a ni,” a ti.

Zakapa hi Fanai lal Dokhama, Sailulak lal fapa niin 1839-ah a piang a, kum 1891 kumtir lama South Lushai Hills Superintendent CS. Murray-a'n Khawhri khuaa nula a phutna huaisen taka “Kan hnam dan a ni lo,” tia a lo hnial dan leh an indo zui dan chanchin he hunah hian tarlan a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man