Larsap te nupa in International Day of Sign Languages puala hun hman an hmanpui

Mizoram Governor Dr. Hari Babu Kambhampati leh a nupui Lady Governor Dr. Jayashree Kambhampati hovin nimin khan Gilead Special School (GSS), Bawngkawn Brigade, Aizawl-ah ‘International Day of Sign Languages’ pualin hun hman a ni.

Spastic Society of Mizoram bultuma he ni puala hun hman ah hian Governor chuan ‘International Day of Sign Languages’ pual hian Mizoram hmun hrang hranga Pianphunga rualbanlo te leh an nu leh pate zawng zawng duhsakna chibai bukin, Kut zaizira inbiakpawh theih chu thil pawimawh tak a nih thu leh Beng tha lo leh tawng harsatte tan chauh ni lovin, Hnam hrang hrangte tawng inhriatsak lem loh te pawhin inbiakna atana an hman theih leh inpumkhatna atan hmanraw tha tak a nih thu a sawi a. Sawrkar hmalakna leh Spastic Society of Mizoram thawhrimna leh inpekna avangin hetiang Zirna School danglam bik, Gilead Special School Mizoram-ah kum 30 chuang hlawhtling takin a lo kal chu ropui a tih thu a sawi a. He School-ah hian Vocational Training Center leh Skill Development Wing kaltlangin zirlaite hnenah thiamthil an zirtir chu tha an tih thu a sawi bawk. He School atanga zirchhuakta te zingah themthiamna lam puanthui, Carpentry leh eizawnna dangah te mi hlawhtling tak tak an awm chho zel chu hlawhtlinna ropui tak a nih thu Governor chuan a sawi bawk.

Kumin hian Zaizira Inbiakna puala ni bikah hian thupui atan - ‘Bengngawngte’n khawi hmunah pawh harsatna nei lova zaizira an duh zawng te an sawi theihna Khawvel!’ tih hman a ni a, nimin-a hemi puala hun hman hi Spastic Society of Mizoram Chairperson Chhingpuii chuan kaihruaiin Prof. Margaret Ch. Zama, Director of Services, GSS chuan School chanchin leh hlawhtlinna langsar zual deuh te a tarlang a. He hunah hian Governor hian Spastic Society of MizoramInstagram Account leh YouTube Channel a tlangzarh nghal a. Heng Social Media account te hi mipui inzirtirna atan te, State chhung hmun danga vohbik naupang nu leh pa te tan thil tangkai tur inkawhhmuhna atan te a siam a ni.