Air Marshal SP Dharkar-a’n CM leh Larsap a kawm

India thlawhna sipai hotu Air Marshal Dharkar, PVSM, AVSM, Air Officer Commanding-in-Chief, Eastern Air Command chuan nimin khan Mizoram rawn thlengin Chief Minister leh Governor te a kawm.

Air Officer Commanding-in-Chief hian Chief Minister Zoramthanga chu a Pisa-ah kawmin Civil mite leh Air Force lamten an inhmantawm theih Airport leh Heliport Mizoram-a din dan tur an sawidun a. Air Marshal SP. Dharkar chuan Mizoram chu a vawi khat kalna a nih thu sawiin, mawi a tih thu leh khualzinte tan pawha tlawh nahawm tak nia a hriat thu Chief Minister hi a hrilh a. Tun tuma Mizoram a rawn kal chhan ber chu India hmarchhak venhimna tihchak zel nana Mizoram-a Airport tha Heliport nei tel, Helicopter engemawzat chhawp theihna siamna tur hmunhma tha a awm leh awm loh rawn enfiah a nih thu a sawiin, chutiang tur hmunhma a awm a nih chuan theihtawp chhuaha tihhlawhtlin ngei a tum tur thu Chief Minister hi a hrilh a ni.

Chief Minister hian Indian Airforce Eastern Air Command hotulu berin a tlawh avanga lawmthu lo hrilhin, Mizoram chhim lamah Airport tha tak, Civil leh Air Force lam ten an hman tangkai theih tur awm se tha a tih thu Air Marshal hi a lo hrilh a. Chutiang atana hman theih tur hmunhma chu hmun hnihah an hual thu Air Marshal hi a lo hrilhin, Air Marshal hian a rang lama a bawhzui nghal tur thu Chief Minister hi a hrilh nghal a ni. Airport thar neih dan tur chungchang bakah hian ram venhimna atana Mizorama hmalak tulna hrang hrang te an sawidun bawk.

Air Marshal SP Dharkar hian nimin vek khan Governor Dr. Hari Babu Kambhampati chu Raj Bhavan-ah kawm bawkin Governor hnenah hian Mizoram a rawn tlawh chhan leh a hun hman dan turte a hrilh a. Mizoram-a Indian Air Force hmalakna hrang hrangte pawh a sawipui bawk.

Comments

Popular News (Last 30 Days)

LPG man bithliah thar