Mizoram-a Journalist boral te ralna sumfai hlan

Mizoram Sawrkarin Mizoram-a Journalist boralte ralna a pek thin, Ex-Gratia chu nimin khan MJA member 3, Accredited Journalist pahnih leh midang pakhat chhungte hnenah I&PR Minister Lalruatkima chuan a hlan.

Aizawl-a I&PR Auditorium-a Ex-Gratia hlanna puala hun hman ah I&PR Minister Lalruatkima chuan Chanchinbu mi sun takte a ui tak zet thu leh an kalsan chhungte a tawrhpui thu sawiin, an sulhnu chhinchhiah tlak tak takte chu hriatreng a ni tawh dawn a ni, a ti a. Sawrkarin Journalist tan hamthatna engemawzat a chhawpchhuah thu sawiin, Mizoram Journalist Welfare Scheme hnuaiah kum khat atan cheng nuai 20 a dah thu leh hei hi damloh nikhua-a Medical Bill atan leh Ex-Gratia atana hman thin a nih thu a sawi a. Journalist Pension Scheme chungchanga hmalak dante tarlangin, a hlawhtlin theih nan theihtawp chhuah mek a nih thu a sawi bawk.

Mipui leh Sawrkar inkara Palai hna thawktu pawimawh tak I&PR Department leh MJA te chu inghneng tlat an nih thu I&PR Minister tarlangin, Social Media kaltlanga thu belhchian dawl lo vawrhdarh tin te ven leh thudik puanchhuah kawnga hmalakho zel a pawimawh thu a sawi a. Mipuite kawng dik kawhhmuha zirtirna dik pek kawnga hmalak hi kan mawhphurhna a ni, a ti. Lehkha chhiar tam intihhmuh a tul thu leh uar zawka chanchinbu chhiar tura inzirtir a pawimawh thu pawh sawiin, MJA member-te chu hruaitu hmasate inpekna chhawmnung zel turin a fuih a. Zonun zemawi zirtirna pek kawngah leh Sawrkar thu leh hla puanzar kawnga tan la zel turin a chah a, midangte fuihphura finchhuahtu nih tum turin a chah nghal bawk.

Nimin-a he hun hman ah hian Accredited Journalist 2, December ni 2, 2022 a boral Alfred Vanchhawng (Stringer, DDK Aizawl) leh December ni 27, 2022 a boral V. Zoramthara (News Reporter, LPS Vision) chhungte hnenah Ex-Gratia Rs 1,50,000/- ve ve hlan niin, Journalist member dang May ni 23, 2023 a boral E. Lalhleia (Editor, Aizawl Observer) chhungte hnenah s 1,00,000/- hlan a ni bawk.

MJA member thite ralna hun hi I&PR Director C.Lalnunkima chuan kaihruaiin MJA member boral-te Department-in an ui thu a sawi a. An chhungte chu harsatna an tawhte leh mamawh an neihte inthlahrung hauh lova Department lama thlen thin turin a chah bawk. He hunah hian I&PR Department thawktute, MJA member leh mithi chhungte an tel a. Sunna hun tawi hman a nih hnuah member thite chanchin tlangpui MJA Hqrs. Aizawl President C. Lalrambuatsaiha chuan a sawi bawk.

Mizoram Sawrkar chuan Accredited Journalist thite Rs 1,50,000/- leh Non-Accredited Journalist thite Rs 1,00,000/- in a ral thin a ni.

Comments

Popular News (Last 30 Days)

LPG man bithliah thar