Hlawhtling turin mahni inthunun theihna leh thuawihna a pawimawh - Er. Lalrinawma

Social Welfare & Tribal Affairs Minister Er. Lalrinawma chuan Infiamna kawnga hlawhtling tak tak tur chuan talent neih that chauh a tawk lo tih sawiin, mahni inthunun theihna leh thuawihna a pawimawh thu a sawi.
Serchhip District Volleyball Association (SDVA) buatsaih ‘SDVA Season Opening Tournament’ hawnna nimin chawhnu-a New Serchhip Volleyball Court-a neih a hmanpuina ah SW&TA Minister Er. Lalrinawma chuan Serchhip District Volleyball Association ten District pum huap Volleyball Tournament an buatsaih chu lawmawm a tih thu sawiin, Volleyball lama tui, talent nei tha, thalai infiammi ten hma an sawn zel theihnana tangkai a nih ngei a beisei thu a sawi a. Tunlai khawvelah Sports a thang chak tih sawiin, “Eizawnna tling a ni tawh a, Mizoram sawrkar pawhin chu chu hriain thalai infiammi te tana kawng hawng turin Sports Policy a nei hial a ni,” a ti a. “Infiamna kawngah hlawhtling tak tak tur chuan talent neih that chauh a tawk lo a, mahni inthunun theihna leh thuawihna a pawimawh a ni,” a ti bawk. Minister chuan infiammi te chu mahni invawng a, thlen chin tur inbituk a, Mizoram chhungah chauh ni lo, State pawnah leh khawvel huap pawha lang pha an nih theih nan an rilru siam turin a chah a. Player talent nei tha tak tak te pawh mahni inthunna an neih loh chuan an chuai leh mai thin tih sawiin, hlawhtlinna leh daihreina laimu chu mahni inthunun theihna a nih thu a sawi bawk.

Serchhip District Volleyball Association (SDVA) President K. Tlangthanmawia kaihhruai he Tournament hawnna hunah hian Minister hian District Referee Exam-a pass mi pahnih, Huntharnghaka (Hriantlang) leh TC. Hmingthanpuia (Bungtlang) te hnenah Certificate leh Referee Jersey a hlan bawk.

SDVA Season Opening Tournament-ah hian Mipa leh Hmeichhia inelna buatsaih niin Mipa-ah Team 13 leh Hmeichhia-ah Team 6 an tel a. Mipa hi Pool 4-ah thenin Pool pakhat a awm te hi an inhmachhawn kual theuh hnuah Pool tina a titha pahnih zel ten Quarter Final an khel anga, Quarter Final atang hian Knockout System a khelh a ni ang. Hmeichhe inelna a tel Team 6 te hi Pool pahnih ah then niin Pool pakhat a awm te hi inhmachhawn kualin Pool pahnih atanga point hmu sang pahnih ve ve ten Semi Final an khel dawn bawk a ni.