Mi 2 hnenah huaisen chawimawina hlan an ni

Kolasib District chhunga mi pahnih te chu nimin khan huaisen chawimawina, Uttam Jeevan Raksha Padak hlan an ni.

Sawrkar laipui Ministry of Home Affairs-in mi huaisen, mi dangte nun chhan nana mahni nunna thapa che chhuakte a chawimawina, Jeevan Raksha Padak Award 2022 hnuaia chawimawina chi khat, Uttam Jeevan Raksha Padak hi Kolasib District chhunga mi, Lianzalama, Kolasib Diakkawn leh Lalchhuan-liana (L), Kolasib Diakkawn te hnenah hlan niin he chawimawina hi District Bawrhsap John LT. Sanga chuan nimin khan Kolasib DC Conference Hall-ah a hlan a. Bawrhsap hian Lianzalama, Kolasib Diakkawn hnenah he chawimawina in a kentel Medal leh Certificate hlanin Lalchhuanliana (L), Kolasib Diakkawn chawimawina dawnin a kentel Medal leh Certificate chu a nupui, Zachhingi hnenah Kolasib District Sr. Superintendent of Police Lalrinawma Traite chuan a hlan thung a. Chawimawina in a ken tel pawisa erawh chu a dawngtute account-ah Ministry of Home Affairs-in an lo thun tawh a ni.

August ni 27, 2021 (Zirtawpni) tlai khan Kolasib Diakkawn Veng-a VL. Siama Parte fapa pathum, Albert Vanlalhriata, (40), Andrew Vanlalhruaia (40) leh William Lalduhawma (35) te chu an In rel mek hnuaia an tuizem an tihfainaah vanduaithlak takin nunna an chan a. Tuizem chhunga an chetsual thu hriat a nih veleh mi tlawmngaite'n anmahni chhanchhuah tuma hma la nghalin, Lalchhuanliana (60), Kolasib Diakkawn Salem Veng a mi Bazar kal haw chuan tanpui turin tuizem chhungah a lut ve a. Hetia mi nun chhan nana a chet chhuahna lamah hian chesual vein, District Hospital Kolasib panpui a nih hnuah a nun a chan zui ve a. Lalchhuanliana (L) hi sipai bang, pa tlawmngai tak niin mi dang chhan a tumna lama a nun a chan avang hian Uttam Jeevan Raksha Padak Award hi hlan a ni.

He thil thlengah vek hian a hun laia Kolasib Vengthar-a khawsa, Lianzalama chu Tuizem-ah hian lutin Tuizem chhunga chesual mi pali zinga pahnih chu tuizem chhung atanga a lakchhuah hnuah amah pawhin thawk a harsat tak avangin pawn lamah an pawtchhuak a, nikhaw hre lova awm zuiin, a nunna a chan phah ve tep nghe nghe a. Hetia midang chhan nana a nunna thapa a chet chhuah avang hian Uttam Jeevan Raksha Padak Award hi hlan a ni bawk.

Jeevan Raksha Padak Award hi midang chhan nana mahni nunna thapa chhanchhuah hna thawkte hnenah hlan thin niin Uttam Jeevan Raksha Padak hian Medal leh Certificate bakah pawisafai Rs. 1,50,000/- a kengtel a. Kum 2022 atan Mizoram atangin Sarvottam Jeevan Raksha Padak leh Jeevan Raksha Padak dawng mi pakhat ve ve awmin Uttam Jeevan Raksha Padak dawng mi pahnih an awm bawk a ni.