Mizoram-ah Swachhata Hi Seva hawnna neih a ni

Deputy Chief Minister Tawnluia chuan Mizoram khawlai te a lo fai a, a lo thianghlim zawk nan leh luite pawh a lo thianghlim nan inzirtir leh infuih tam a pawimawh a ni, a ti.

India ram puma faina kawnga hmalakna tur programme, Swachhata Hi Seva hawnna Mizoram tana nimin-a MRB Auditorium, Aizawl-a neih ah Deputy Chief Minister chuan bawlhhlawh enkawl leh sawngbawl kawnga hmasawnna hmuh beiseiin tun thla ni 15 atanga thla thar ni 2 chhungin Swachhata Hi Seva hnuaiah India ram pumah programme hrang hrang buatsaih a nih dawn thu a sawi a. Mizoram chu bawlhhlawh awm lo, hmun thianghlim tak a nih theih nan kawng hrang hranga hmalak mek a nih thu leh hlawhtlinna pawh kawng tam takah hmuh a nih thu a sawi a ni.

Deputy Chief Minister chuan Mizoram sawrkarin bawlhhlawh sawngbawlna lam leh faina lam chu a ngaihpawimawh thu leh Solid Waste Management atan cheng vbc. 50 a dah thu a sawi a. Mizoram mipuite chu faina chungchanga inzirtirna uar turin a sawm bawk. Deputy Chief Minister hian faina lama thawk tha mi hrang hrang chawimawina a hlan bawk.