September 29, 2023-ah Mim Kut hman a ni dawn

Mizote Kut chi thum - Mim Kut, Pawl Kut leh Chapchar Kut te zinga hman lar tawh loh ‘Mim Kut’ chu Nodal Department Social Welfare & Tribal Affairs Department kaltlangin a tum khatna atan September ni 29, 2023-ah Vanapa Hall, Aizawl-ah hman a ni dawn.

Mim Kut chungchang ngaihtuah hian State Level Steering Committee chu nimin khan an Chairman leh Social Welfare & Tribal Affairs Minister Er. Lalrinawma hovin a Pisa-ah an thukhawm a, Mim Kut hi September 29, 2023-ah Aizawl Vanapa Hall-aj hman tura rel niin Mim Kut ni hian chhungtin ten an hmangaih kalta te puala chawhlui kil, Thlan tihfai, Pangpar dah, Thlan ram tawh cheithat leh midang harsa zawkte tan luanchhuaha malsawmna ni anga hmang turin an ngen a. State Level Steering Committee ngenna angin MIMA chuan anmahni dawrtute chu ‘Mim Kut discount’ an pe dawn a. Riangvaite Thlanmual, Zemabawk chu tihfai leh cheithat tura rel a ni bawk.

Sawrkar thuchhuah in a tarlan danin, Mizo pi puten hringnun khawvel leh thlarau khawvel inzawm zia an hriat dan Mim Kut hian a tarlang a. Vaimim seng zawh (September)-a hman Mim Kut hi mitthi ngaia tahna Kut a ni a, amaherawh chu kan pi leh pu ten damlai khawvel leh fam chang tawh khawvel inzawmna an lo hriat zia a tilang a. Chanchin tha lo thleng tur atana buatsaihna leh temlawkna Kut hlu tak an lo hmang thin a ni. Kristianna Mizoram-ah a lo luh atangin Mizote nunphung leh chin than thil tam tak min thiah sak a, chu chuan kan Mizo hmel leh nunphung a tidanglam nasa hle a. Sakhaw thar Kristianna leh heng thil hluite hi inmil theiin an hre lova, chuvangin pipute thil lo chin than tam tak chu zawi zawiin a lo chuaiin thangtharte rilru-ah hmun a chang ta lo tial tial a ni.

Mizo Kristiante zingah lehkhathiam leh mi vengva tak tak an lo awm chho ta zel a, Kristianten an lo hnawl tawh Kut pawhin lainattu leh hmangaihtu a nei chho ta zel tih tarlangin, Mizote zingah mahni hnam thila harh tharna (cultural revival) a lo thleng ta zel a, Mizo nunphung leh hnamzia mualliam tawha ngaihte nasa takin a rawn chawilar thar ta a. Heng zingah hian Mizoten Kut neih pathum zinga pakhat ‘Mim Kut’ pilbo tawha ngaih hnu chu kan Kristianna mil leh inhnerem zawnga hman atan Social Welfare & Tribal Affairs Department chuan Ministry of Tribal Affairs, Govt. of India atangin cheng nuai 20 hmuin kumin atangin ‘Mim Kut’ chu hman tan tum a ni ta a ni.

Nimin-a thutkhawm ah hian ‘Mim Kut Logo’ siam intihsiaknaa thehlut 54-te chu uluk taka enfiah niin ‘Mim Kut Logo’ atan Jonathan Zorinpuia, Mizoram House, Vasant Vihar, New Delhi ziah chu thlan a ni a, hei hian lawmman sumfai Rs. 10.000/- a keng tel a ni.