Nunna hlantu hnenah huaisen chawimawina hlan

India ram-a Civil mite tana huaisenna chawimawina sang, Sarvottam Jeevan Raksha Padak Award chu nimin khan Imanuel Lalawmpuia (L) S/o Ronald Lalchhuanawma (Mualpheng) hnenah hlan a ni.

Huaisen chawimawina hlanna puala inkhawm nimin-a Saitual DC Conference Hall-a neih ah Sarvottam Jeevan Raksha Padak Award, Citation leh Medal hlantu Saitual District Bawrhsap Dr. Lalngura Tlau chuan Saitual District chhunga India rama Civil mi, mi huaisen te tana chawimawina sang ber dawng thei an awm chu a ropui a takzet tih sawiin, huaisen chawimawina chu chi thum a awm thu lehchung zinga sang ber chu midang tana nunna hlantute hnenah hlan thin, Sarvottam Jeevan Raksha Padak Award a nih thu a sawi bawk.

Imanuel Lalawmpuia (L) hi Ronald Lalchhuanawma leh Lalfakawmi te fapa niin midang chhan nana nunna a chan lai hian BA 6th Sem zirlai a ni a, Imanuel Lalawmpuia (L) leh a thiante hi April ni 2, 2022 khan Mizoram Sahuan en-a an kal hawlam Tlawnglui Sihhmui kai-ah inchiahdai leh tura an kal chu a thianpa Larry Lawmnakima chu tui-ah tla in a talbuai a, a thianpa chhan tur hian tui-a lut nghalin a thianpa hi a chhan theih laiin Immanuel Lalawmpuia hi tui khauh takin lain nunna a chan phah thung a ni.

Sarvottam Jeevan Raksha Padak Award hi India ramin mi huaisen te, hun leh hmun harsa tak kara mahni nunna hial thapa midang nunna chhanchhuaktute hnen a a hlan thin a ni a. Award hian Medal, Citation leh Pawisa fai Rs. 2,00,000 a kengtel a ni.