Mizoram-ah EMRS 5 hawn niin sak mek 5 a awm bakah a dang 6 sakna tur pek a ni tawh bawk

Mizoram-ah Eklavya Model Residential School (EMRS) panga (5) hawn mek niin a dang panga sak mek a nih bakah a dang 6 sakna tur pawh Mizoram chu pek leh a ni bawk.

Tunhnaia thuthar thehdarhtute a kawmna ah Social Welfare & Tribal Affairs Minister E. Lalrinawma chuan Eklavya Model Residential School (EMRS) hi Mizorma-ah panga (5) hawn mek a nih thu hi sawiin, heng te hi Lunglei, Serchhip, Ngopa, Lawngtlai leh Chawngte-ah te a nih thu a sawi a, heng ah hian naupang 1210 leh thawktu mi 130 an awm mek thu a sawi a ni. SW&TA Minister chuan EMRS a zirna hi a thlawn vek a nih avangin a hlu em em tih sawiin, Mizoram zirna pawh nasa taka a chawikan beisei a nih thu leh a tangkai thu a sawi a. Mizoram-a EMRS hawn mek te bakah hian hmun 5-ah sak mek a ni bawk tih sawiin, chungte chu Tlangnuam (Aizawl), Zawlnuam, Bilkhawthlir leh Niawhtlang-ah te a nih thu a sawi a. Heng bakah hian Ministry lam chuan hmun 6, Darlawn, West Phaileng, Khawzawl, Khawbung, Hnahthial leh Lungsen-ah te min pe leh tih sawiin, NEST chuan contractor TCIL pawh an thlang tawh tih a sawi bawk a ni.

SW&TA Department hnuaia hmalakna dang te pawh tarlangin Er. Lalrinawma chuan Tribal Research Institute (TRI) hnuaiah ruahmanna hrang hrang siam niin Mizoram chhunga hun pawimawh Pawl Kut, Boisu, Mim Kut leh adangte hman anih theih nan sum te zuk dil thin a nih thu a sawi a. Heng mai bakah hian Tribal Research Institute Building chu cheng nuai 2,028.5 leh Lalnu Ropuiliani Museum chu cheng nuai 1500 senga sak hna thawh a nih thu a sawi a. PMAAGY hnuaiah Mizoram khaw 344 chu thlanchhuah niin khaw pakhat tan cheng nuai 20.3 chu zirna, hriselna leh inkalpawhna atana ruahman a ni tih a sawi a. Kum 2021-2022 chhungin khaw 57 ah hmalak a nih thu leh tunah hian khaw thlanchhuah zawng zawnga hmalak a nih theihna turin chak taka bawhzui mek a ni tih a sawi.

Article 271 (1) pawh tangkai taka hman a nih thu leh zirna, hriselna, kutthemthiamna leh infiamna lamah te hman theih a nih thu Minister chuan sawiin, he Scheme hmang hian Tribal Girls Hostel engemaw zat te, Multipurpose Hall leh thil dang tam tak thawh niin kum khat-ah cheng vbc. 19.01 vel hmuh a ni thin tih a sawi a. Heng zat sum hmu tur hian Project siam thin a nih thu Minister chuan a sawi bawk a ni.