Kutthemthiamte tihhmasawnna kawnga hmalakna 'PM Vishwakarma Scheme' hawnna hun hman a ni

India ram puma kalpui tur PM Vishwakarma Scheme hawnna chu nimin khan Vishwakarma Jayanti leh Prime Minister pian champhaphak vawi 73-na pualin neih a ni a, he hun hi ramchhunga hmun 70-ah hman niin Aizawl-ah pawh Ministry of Development of North Eastern Region (DoNER) a Minister of State BL. Verma hovin neih a ni.

Nimin-a Scheme thar hawn tak PM Vishwakarma Scheme hi mahni kutkawih leh hmanraw neih ang angte tangkai taka hmanga kutthemthiamna hrang hrang neite hmalakna hriatpui leh chhawmdawl hna thawhna tur niin an thil dehchhuah hlutna ti sang tur leh MSME Value Chain nena thlunzawm thei tura duan a ni a. A buttan nan hian cheng vbc. 13,000 ruahman niin Traditional Trade 18-ah kalpui a ni dawn a, Ministry of Micro, Small & Medium Enterprise chu Nodal Delar a ni a, beneficiary zawnchhuah, thiamthil tipung tura training pek, sum leh pai tanpuina pek leh an thil siamchhuah hralhna tur ngaihtuah thleng a huam a. Hamthatna dawng theite chu PM Vishwakarma Portal-ah biometric hmanga inziahluh theih niin PM Vishwakarma Certificate leh ID Card pek an ni ang a, scheme hnuaia hamthatna awmte an dawng thei dawn a ni.

Aizawl Vanapa Hall-a PM Vishwakarma Scheme hawnna puala inkhawm ah hian Union MoS BL. Verma chuan langlo lama tangkai taka ram tana hnathawktu kutthemthiam, thiam thil hrang hrang neite hmalakna ropui a tih thu sawiin, an hmalakna te chawisanga ram tana an hnathawh hlu tak hriatpuina leh tihchangtlunna tur PM Vishwakarma Scheme duanchhuah a ni chu lawmawm a tih thu a sawi a. Hemi kalpui tur hian Sawrkar laipuiin cheng vbc. 13,000 a ruahman thu leh Ministry pathum in an kalpui dawn thu sawiin, hemi hnuaia hamthatna dawngtu Vishwakarma-te chu sum leh pai-a tanpuina, Training & Stipend, hmanraw leina tur Rs. 15,000/- thleng leh an thil dehchhuahte hralhna thlenga ngaihtuah sak tum an nih thu a sawi a. Dahkham ngai lovin loan pung tlem cheng nuai 3 thleng a lak theih dawn a, chhawmdawlna dangte pawh pek an ni dawn tih a sawi.

Pipu hun lai ami kutthemthiamna chhawm-nung zelte tuamhlawm chu ngaih pawimawh a nih dawn thu Union Minister chuan sawiin, mahni kutkawiha thil siamchhuah tih changtlun leh zawrh chhuah thlengin a pui thei dawn tih a sawi a. A bultan nan thiamthil hrang hrang siamna Trade 18 ah te bultan a nih dawn thu leh thingtlang leh khawpuite tuamchhuah vek tum a nih thu a sawi bawk a. Hnathawhna bungrua leh hmanraw changkang zawk pek an nih dawn thu pawh tarlangin, hei hian thil siam hlutna a tihpun phah dawn bakah a hralhna chenin a pui thei dawn a ni, a ti bawk

Heng bakah hian Sawrkar laipui hmalakna hrang hrangte leh hemi kaltlanga hlawhtlinna hrang hrangte Minister tarlangin, Mizoram-ah pawh DoNER Ministry leh Ministry dangte kaltlangin hmasawnna ruhrel pawimawh siam nual a nih thu a sawi a. Kum 10 kalta chhungin NEC scheme kaltlangin Mizoram-ah Project 103, cheng vbc. 554.19 hu sanction a nih thu a sawi bawk.

Nimin-a he hun hmanna a khual zahawm I&PR Minister Lalruatkima chuan kutthemthiamte tihhmasawnna kawnga hmalakna 'PM Vishwakarma Scheme' duanchhuah a ni leh Mizoram-ah pawh kalpui a ni tur chu lawmawm a tih thu a sawi a. Tual-chhung kutthemthiamte hnathawh hriatpuina mai bakah chhawmdawl nana tangkai tak tur a ni a, hei hian Sawrkarin kutthemthiamna hmanga mahni phak tawka eizawngte a thlahthlam loh zia a tarlang a ni, a ti bawk.

He hunah hian Chief Secretary Dr. Renu Sharma leh sawrkar mi pawimawh dang ten thu sawiin, India International Convention and Expo Centre (IICC)/Yashabhoomi, Dwarka, New Delhi-a ram chhung hmun hrang hrangte puala Prime Minister hova hun hman chu live streaming kaltlanga zawmin Prime Minister thuchah sawi ngaihthlak a ni bawk.

Comments

Popular News (Last 30 Days)

LPG man bithliah thar