Mihring phur chi lirthei-ah Vehicle Location Tracking System (VLTS) vuah tura hmalak a ni

Mihring (passenger) phur lirthei chi hrang hrang - Taxi, Maxi Cab, Bus leh Rental Car-ah te an awmna chin hriat theihna, Vehicle Location Tracking System (VLTS) vuah vek tur niin Mizoram-ah pawh he Project thar hi tunkar Zirtawpni (September 15, 2023) khian hawn tum a ni.

Transport Department-a thawktute sawi danin VLTS khawl (device) hi mihring phur chi lirthei hrang hrangah lirthei khalhtu (driver) leh a mi phurh (passenger)-te inkarah dah/vuah a ni anga. Passenger-ten engemaw buaina leh harsatna an tawh chuan chu khawl a hmehna awm (button) chu an hmet ang a, chu signal chu Command and Control Centre leh Emergency Response Support System Team (Police) te nen thlunzawm a ni a, helaia duty te hian an lo chhinchhiah anga, lirthei awmna, a tlanna lam, a tlan chak zawng, Motor Registration number leh a neitu kha a hriat theih dawn a ni.

Transport Department thawktute chuan VLTS hi passenger phur chi lirtheite chuan an lei tirh atangin an vuah ngei ngei a ngai dawn tih pawh sawiin, hemi tel lo chuan lirthei an ziaklut (register) thei dawn lo a. Motor hlui ah pawh January 1, 2019 hnu lama Taxi leh Passenger phur lirtheite chuan an vuah ngei ngei a ngai tih sawiin, VLTS hman atanga thla 12 chhunga an vuah lo a nih chuan Fitness Certificate pek theih an ni tawh dawn lo a, an permit pawh replace phal a ni dawn lo a ni. Mihring phur chi lirthei ah VLTS hi vuah vek tur tih a ni chungin Two Wheeler Taxi leh Auto Rickshaw te erawh a huam dawn lo a, a khawl hi Rs. 12,000 man a ni a, lirthei neituten an lei a ngai dawn a ni.

VLTS hi Nirbhaya case tia hriat lar, kum 2012-a Delhi-a bus chhunga pawngsualna rapthlak tak thleng vanga sawrkar laipuiin lirthei a chuang, a bikin hmeichhiate himna atana hma a lakna a ni a. Ministry of Women & Child Development pawmpuina hnuaiah Nibhaya Framework vuahin Project hi kalpui a ni. Ministry of Road Transport & Highway chuan October 25, 2018 khan hriattirna chhuahin State tinte chu January 1, 2019 atangin passenger phur lirthei-ah VLTS leh emergency button vuah vek turin a ti a, Mizoram bikah VLTS project kalpui nan hian cheng vaibelchhe 10.4 ngai tura chhut a ni a, a senso 90% hi central in a tum ang a, 10% chu state tum ve tur a ni thung ang.

Mizoram-ah chuan VLTS atan hian Directorate of Transport building, Aizawl-ah Command and Control Centre dah niin, hemi hnuaiah hian thawktu mi 15 dah an ni a. VLTS hi State hrang hrangte chuan an hmang tan nual tawh a, India hmarchhak State bikah chuan Mizoram hi a hmang hmasa pawl a ni dawn a ni.