Kum khat chhungin innei inziaklut 3238 awm

Sawrkar kum liamta, nikum (2022) April atanga kumin (2023) March thla inkar chhung khan Mizoram-ah Innei inziaklut mi 3,238 an awm.

Registrar of Marriages chhinchhiah danin nikum chhunga Mizoram-a innei inziaklut zinga 2,608 hi Kristian dana innei an ni a, innei thar atanga chhutin 80.54% zet a tling a. A dangte hi Buddhist Sakhaw dana innei 615 leh Hindu dan a innei nupa 15 an ni a, Sakhaw dang dana innei an awm lo thung a ni.

Innei thar chhinchhiahna, The Mizoram Compulsory Registration of Marriage Act hi kum 2008 atang khan kalpui tan niin April, 2008 atanga March, 2023 thleng khan innei mi 38,434 chhinchhiah an ni tawh a. Heng zingah hian Kristian dan a innei tam berin 35,219 an awm a, Buddhist-in dawtin 3039 an awm a, Hindu dana innei 172, Muslim pakhat leh sakhaw dang pathum an awm bawk a ni.