Tripura E. Roll-a la thun loh te Mizoram Roll-ah thun duh

Mizoram atanga Tripura pem thla a inbeng-bel ta Bru hruaitute chuan Tripura Electoral Roll a la thun ve loh Bru vote nei thenkhat chu Mizo-ram Electoral Roll-a la awmtir zui an duh thu Election Commission hnenah an thlen.

Mizoram Bru Displaced People's Forum (MBDPF) General Secretary Bruno Msha chuan Election Commission of India hnenah tunhnai khan lehkha thawnin Tripura a inbengbel tawh, Tripura Electoral Roll-a la thun loh an awm niin a sawi a. Heng hote hi Mizoram Electoral Roll atanga paih lova la awmtir rih turin a ngen a. Vote thlak hi India khua leh tui zawng zawng chanvo a nih avangin khawi Electoral Roll berah emaw an awm hi an chanvo a ni, a ti.

Hemi chungchangah hian Bruno Msha chuan Tripura a inbengbel tawh, Electoral Roll a la thun ve loh hi mi 3,500 vel an awm niin a sawi a. Chu'ng mite chu Mizoram Electoral Roll atanga paih lo turin Election Commission a dil niin a sawi a. Mizoram Election Department hotute chuan tun thlengin hemi chungchang ah hian Election Commission lam atangin engmah an la dawng lo niin an sawi a. Election Commission hian MBDPF te ngenna hi a ngai thutak lem lo ni a an rin thu an sawi bawk.

Hetihlai hian Mizoram Electoral Roll a la chuang Tripura a inbengbel tawhte chu tunhnai-ah an vai a an hming paih an nih thu sawi a ni a. Thudawnna-in a sawi dan chuan Bru vote nei mi 11,997 te hming chu paih a ni tawh a, hei hi thla thar October ni 4-a Electoral Roll thar ber tar-chhuah a nih hunah a zat diktak chu a chiang chauh dawn ni a thudawn a ni. Mizoram atanga Tripura-a chhukthla Bru te hi hun engemaw chen Mizoram Electoral Roll-a an awm hnuah sawrkar laipui te nen inremna ziakin Tripura Electoral Roll a khung tur hian tih an ni.

Comments

Popular News (Last 30 Days)

LPG man bithliah thar