Mi rilru nei leh tumruh tan hmanlai aiin eizawnna a awlsam tawh - K. Vanlalvena MP (RS)

Mizoram Rajya Sabha MP K. Vanlalvena chuan mi rilru nei leh tumruh tan hmanlai aiin eizawnna a awlsam tawh thu a sawi.
Nizan hmasa a Mizo Students’ Union (MSU) General Conference vawi 21-na Thenzawl Auditorium-a neih a hmanpuina ah Rajya Sabha MP K. Vanlalvena chuan kan ram chu Vawiin-a thalai, Zirlaite kut ah ala awm ngei ngei dawn tih sawiin, Vawiin-a kan thalaite leh zirlaite an that chuan kan ram ala tha dawn tihna a nih thu leh kan ram innghahna an la nih dawn thu a sawi a. Hmanlai aiin tunlaiah mahni hmalam hun siam turin a awlsam tawh zawk tih sawiin, “Mi ti tak tak tan sawrkar hna bakah Sawrkar hnathawk aia hlawh tha nei turin chance a tam tawh a, Mi rilru nei, tumruh tan hmanlai aiin eizawnna a awlsam em em tawh,” tiin mi hlawhtling ni turin mahni a pawimawh ber tih hriaa theihtawp chhuah turin zirlai kalkhawmte chu a sawm a ni.

Mizoram Rajya Sabha MP K. Vanlalvena chuan, Mizo Hnam chu Pathian din a nih thu sawiin, Unau-a Pathian in a siam ten unau kan ni tih kan pawm mai tur a nih thu a sawi a. Zohnahthlak hmun hrang hranga awm te buaina harsatna leh thihna ten Mizo hnam inpumkhatna ah min hruai khawm mek tih sawiin, Zohnahthlak ten harsatna kan tawh chu Pathian in kan hnam inpumkhatna hmanruaah a hman mek thu leh hmun hrang hrangah Zofa ten inpumkhatna kawng kan zawh zel a tul thu a sawi a. Zirlai pawl chu hman atanga Vawiin thlengin hnam inpumkhatna kawnga thawhhlawk ber a ni thin tih sawiin, theihtawp chhuah zel turin a chah a. Tun dinhmunah Mizoram-a Journalist, Print Media leh Cable TV te chu hnam inpumkhat nana thawktu ropui tak an nih tawh thu a sawi bawk.

MSU General Conference nizan hmasa a neih hi Serchhip bialtu MLA Lalduhoma pawhin Uaptu nia hmanpuiin tunlai khawvel thang zelah Social Media te awm mahse, lehkhabu aia innghah nana hman tlak a la ni lo tih a sawi a, Lehkhabu chuan thil a ti thei tih hriaa chhiar uar tur leh ngaihtuahna tha nei turin zirlai kalkhawmte chu a chah bawk.

Nizan hmasa a MSU General Conference-ah hian Myanmar National Unity Government-a Representatives to India Salai Isaac Khen chu Special Guest niin Mizoram mipui leh Sawrkar chungah Raltlan an lo puihna zawng zawngah Myanmar NUG Sawrkar aiawhin lawmthu a sawi bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man